Ishyaka NRM ryasabye u Burundi kutavanga Museveni mu bibazo bufitanye n’u Rwanda

Ishyaka NRM riri ku butegetsi mu gihugu cya Uganda, ryikomye ubuyobozi bw’u Burundi bubusaba kwirinda gushotora chairman waryo, Yoweri Kaguta Museveni, Perezida wa Uganda akaba na Chairman wa EAC muri iki gihe ndetse risaba iki gihugu kutamuvanga mu bibazo gifitanye n’u Rwanda . Ni nyuma y’aho muri iyi weekend ishize, kuwa Gatandatu, itariki 29 Ukuboza, mu gihugu cy’u Burundi humvikanye imyigaragambyo yamaganaga ibaruwa Chairman wa NRM, Perezida Yoweri Museveni yandikiye Perezida Pierre Nkurunziza amusubiza ku kibazo yari yamugejejeho. Abigaragambya bari bitwaje ibyapa bivuga ko: “Amagambo atari aya gicuti cyangwa y’ubushotoranyi yavuzwe n’abanyamahanga barwanya ubuyobozi bw’u Burundi”. Ibyapa bigakomeza bigira biti: “aba banyamahanga bakorana n’abanzi b’u Burundi.” Nk’uko inyandiko yikoma abayobozi b’u Burundi igaragara ku rubuga rwa NRM ikomeza ivuga, ngo iyo myigaragambyo yabaye ikurikira ibaruwa ya Albert Nsekambabaye, umuvugizi w’ishyaka CNDD-FDD yo kuwa Kane, itariki 27 Ukuboza yahamagariye abaturage kujya mu mihanda bakamagana igisubizo Perezida Museveni yahaye Nkurunziza kuwa 08 Ukuboza 2018. NRM ikaba ivuga ko chairman wayo yasubizaga ibaruwa Perezida Nkurunziza yamwandikiye irimo ibintu byo gushinja cyane igerageza gukurura Museveni mu bibazo afitanye n’u Rwanda. Iri shyaka riri ku butegetsi muri Uganda rikavuga ko nka chairman w’Umuryango wa Afurika y’Iburasirazuba, EAC, Perezida Museveni afite uburenganzira bwo kugira icyo avuga ku bibazo by’u Burundi ariko adashobora kwinjizwa mu makimbirane adafite ishingiro yarushaho gusa gukomeza ibibazo biri mu Burundi. Bakavuga ko ibibazo biri ku rwego rw’ibihugu kandi bigomba gushakirwa umuti muri urwo rwego hatagize igice cya gatatu kibyinjiramo kuko atari igisubzo. NRM igakomeza igira iti: “Izindi ntambuko mbi ku ruhande rw’u Burundi zizafatwa nk’ubushotoranyi n’icyizere kibi.” Ngo niba ubuyobozi bw’u Burundi bwarababajwe no kuba Museveni yarasabye ibiganiro hagati ya leta n’abayirwanya ngo nta cyindi gitekerezo washyira imbere kitari icyo kuko ngo kuganira nibyo biranga ubuyobozi bwa Museveni ndetse batanga urugero rw’inama y’umushyikirano aherutse kugirana n’abayobozi b’amashyaka atavuga rumwe n’ubutegetsi. Kubw’ibyo, ngo “Niba abayobozi b’u Burundi bifuza amahoro yuzuye bakaba badashaka kwicarana n’abatavuga rumwe n’ubutegetsi ari nako batesha agaciro imbaraga inshuti zo mu karere zishyira mu gufasha kugarura ituze rirambye, ni intambara zingana iki bazarwana?” Aka kantu gasa nk’agatotsi gatangiye kugaragara mu mubano wa Uganda n’u Burundi kaje mu gihe ibi bihugu byombi byafatwaga nk’inshuti ndetse byombi bikaba bikomeje gushyirwa mu majwi n’abayobozi b’u Rwanda babishinja gushyigikira abashaka guhungabanya umutekano w’u Rwanda.

from bwiza.com http://bit.ly/2RpdqZ3
via IFTTT