Perezida Kagame avuga ko hari ibihugu by’ibituranyi n’u Rwanda bifasha FDLR na RNC

Perezida wa Repubulika, Paul Kagame avuga ko hari ibihugu by’ibituranyi n’u Rwanda, bikomeje gutiza umurindi imitwe igamije guhungabanya umudendezo w’u Rwanda nka FDLR, RNC n’abandi. Ibi Perezida Kagame yabitangaje kuri uyu wa Kabiri tariki ya 1 Mutarama 2019, ubwo yagezaga ijambo ku Banyarwanda ritangiza umwaka Mushya wa 2019, agashimangira ko u Rwanda rufite umutekano uhamye, ndetse ko umubano w’u Rwanda n’ibihugu bya Afurika umeze neza, ariko ko hakiri ibibazo ruterwa na bimwe mu bihugu bituranye narwo. Yagize ati “Umubano w’u Rwanda n’ibihugu bya Afurika umeze neza ariko haracyari ibibazo duterwa na bimwe mu bihugu duturanye, bamwe mu baturanyi bacu bakomeje kugerageza gufasha kuzanzamura imitwe igamije guhungabanya umutekano w’u Rwanda nka FDLR, RNC n’abandi, ibi bibangamira ibikorwa byiza ubundi bisanzwe biranga umuryango wa Afurika y’i Burasirazuba n’umutekano w’aka karere muri rusange”. Yakomeje agira ati “Imyifatire ya kimwe muri ibi bihugu ntidutangaza ahubwo dutangazwa n’icyo gihugu kindi aho ibimenyetso dufite nabo bagomba kuba bafite byerekana ko bafatanya ku mugaragaro nubwo babihakana, iki kibazo turakomeza kukiganira n’abaturanyi bacu mu rwgo rw’imikoranire n’imibanire myiza y’ibihugu bya Afurika”. Perezida wa Repubulika arasaba Abanyarwanda gukomeza gukora imirimo yabo ndetse anavuga ko umwaka wa 2018 wabaye mwiza kandi uba uw’Uburumbuke by’umwihariko ko hari abagifite intege nke bakaneye ubufasha. Ati “Ubundi gufatanya ni ugutera inkunga abatishoboye, bisanzwe mu muco wacu, njye rero n’umuryango wanjye tubifurije mwese n’imiryango yanyu umwaka mushya muhire wa 2019, Imana ibahe umugisha”. Si ubwa mbere Perezida Kagame avuga ko hari ibihugu by’ibituranyi n’u Rwanda bitarwifuraza amahoro. Ku wa 22 Ukuboza 2018, ubwo yatangizaga Biro politiki y’umuryango FPR/INkotanyi, yavuze ko hari abaturanyi babiri batifuriza u Rwanda ineza. Yagize ati “Dufite abaturanyi babiri batatwifuriza ibyiza n’abandi babiri tudafitanye ibibazo. Tuzakomeza kugerageza uko byakemuka. Tuzihatira kugira umubano mwiza n’abandi ariko ntibinakuraho no kwitegura niba ibyo kubana neza twifuza binaniranye”. Kuva mu mwaka wa 2015, umubano w’u Rwanda n’u Burundi wakomeje kuzamba, aho u Burundi buvuga ko ababutera bakabuhungabanyiriza umutekano baturuka mu Rwanda, ku ruhande rw’u Rwanda, ubuyobozi bukaba bwaragiye bubihakana bwivuye inyuma. Umubano w’u Rwanda na Uganda, nawo kuva umwaka wa 2017, watangiye kuvugwamo agatotsi, aho Abanyarwanda bagiye muri iki gihugu bafatwa bamwe bagafungwa bakanahohoterwa bitwa intasi z’u Rwanda, mu bitangazamakuru mpuzamahanga, umubano w’u Rwanda n’ibi bihugu by’ibituranyi ukaba waragarutsweho cyane mu gihe bikomeje kugaragara ko utifashe neza.  

from bwiza.com http://bit.ly/2RnXBSx
via IFTTT