Rusizi: Abakora ubucuruzi bwambukiranya imipaka barishimira ko hari imisoro bakuriweho

Bamwe mu bakora ubucuruzi bwambukiranya imipaka mu karere ka Rusizi, biganjemo abagore, bishimiye ishyirwa mu bikorwa ry’amasezerano y’ubucuruzi hagati y’u Rwanda na Congo-Kinshasa asaba ko bimwe mu bicuruzwa bigabanyirizwa imisoro.

Aya masezerano yatangiye gushyirwa mu bikorwa ku wa 25 Kanama uyu mwaka ,bamwe mu bagore bakora ubucuruzi bwambukiranya imipaka bavana ibicuruzwa mu karere ka Rusizi babijyana i Bukavu muri RDC, babwiye Bwiza.com ko agiye kubagirira akamaro gakomeye cyane kuko imisoro n’amahoro bya hato na hato batangaga bitazongera kubaho.

Ayinkamiye Béatrice umwe muri aba bagore avuga ko basoreshwaga mu buryo bwari bubabaje cyane kuko batamenyaga abashinzwe gusoresha n’abatabishinzwe.

Agira ati “turashimira cyane Leta yacu yagiranye amasezerano y’ubucuruzi bwambukiranya umupaka n’iya Congo-Konshasa, twe twari tubabaye cyane.  Wajyanaga nk’amata,imboga n’ibindi ugatangirira kuri Duwani ya congo usora,uko ugenda uzamuka ugenda usorera abo utazi, ukajya kugera aho ucururiza inyungu yashizemo.’’

Yakomeje agira ati’’ Ikindi cyatuzambyaga ni ukuntu batwamburaga mu mayeri, cyane cyane nk’abajyana amagi i Bukavu, aho wahitaga ku witwa umuyobozi wese agenda akuramo igi rimwe rimwe, hakaba n’abakoramo amagi 2 ukajya kugera aho uyacururiza hasigaye ngerere kandi nta cyo wavuga, ariko aya masezerano aje kuturengera rwose kandi tuzayungukiramo mu buryo bukomeye cyane.

Bavuga ko buri wese yabacaga ayo ashaka nta n’aho yandikwa , ayo umucuruzi asabwe akaba ari yo atanga, ayo asabwe uyu munsi ntabe ari yo asabwa ejo, ishyirwa mu bikorwa ry’aya masezerano rikaba ribaye igisubizo ku banyarwanda bacururiza muri Kongo kuko inyungu babonaga igiye kwiyongera.

Ubuyobozi bw’aka karere ariko buvuga ko aya masezerano yari yaratinze gushyirwa mu bikorwa, umuyobozi w’akarere wungirije ushinzwe iterambere ry’ubukungu, Kankindi Léoncie  yavuze ko kuba yaratinze gushyirwa mu bikorwa byaturutse ku kuba hari ibyari  bitaranozwa neza..

Ati “yaratinze ariko uyu munsi yatangiye kubahirizwa. Uyu munsi ufite ibicuruzwa ashobora kubinyuza ku mupaka nta kibazo, bivuze ko uwahohoterwa cyangwa uwahura n’ikibazo uyu munsi afite aho yabariza. Ikindi ni uko bizakuraho bimwe mu bibazo byavugwaga byo kudakoresha umupaka neza kuko hari abakoreshaga imipaka itemewe kubera gutinya ayo mahoro, ari yo mpamvu kano gace kanavugwamo forode nyinshi, ibyo na byo bizacika kuko byakorwaga kubera gutinya amahoro ariko na yo yakuweho.’’

Ibicuruzwa byakuriweho imisoro ni ibikomoka ku mpande zombi  byambukiranya imipaka  kandi ngo urutonde rwabyo rushobora kuvugururwa igihe byaba ngombwa.

Kanda hano ujye ubona amakuru yihuse kandi kugihe kuri Facebook no kuri twitter

Bahuwiyongera Sylvestre/Bwiza.com

from bwiza http://ift.tt/2wrAYRS
via IFTTT