15. Kagere Meddie yahawe ubwenegihugu bw'u Rwanda
Kagere Meddie yarahiriye ubwenegihugu bw'u Rwanda yari yarambuwe kuko yari yarabubonye mu buryo bunyuranyije n'amategeko. Kagere Meddie yiyongereye ku bandi bakinnye umupira w'amaguru babuherewe igihe kimwe barimo Jimmy Mbaraga (AS Kigali), Cyiza Mugabo Hussein (Mukura), Peter Otema uzwi nka Peter Kagabo (Police Fc), Lomami Marcel (umutoza wa Gasogi), Lomami Andre na Ndanga Michel wigeze kuba umutoza w'abanyezamu wa Rayon Sports igitozwa na Raoul Shungu.
14. APR Fc yasezerewe inshuro 2 mu mwaka umwe mu mikino nyafurika
Muri Werurwe nibwo ikipe ya APR Fc yatsinze Djoliba AC ibitego bibiri kuri kimwe mu mukino wo kwishyura wabereye kuri Stade Amahoro ariko isezererwa muri Caf Confederations cup kubera igitego kimwe yari yatsindiwe mu mukino ubanza wabereye muri Mali.
Uyu mwaka n'ubundi ikipe ya APR Fc yari ihagarariye u Rwanda mu mikino y'amakipe yabaye aya mbere iwayo maze mu kwezi k'Ukuboza nabwo isezererwa na Club Africain yo muri Tunisia ku bitego 3-1 mu mukino ubanza w'amajonjora ya Champions League ihita isezererwa muri aya marushanwa kuko yari yanganyije 1-1 I Kigali.
13. Umutoza w'ikipe ya Les Amis Sportif yahitanywe n'impanuka
Uyyu mwaka kandi wa 2018 uri mu myaka yababaje abakunzi b'umukino w'amagare mu Rwanda kuko Rugambwa Jean Baptiste wari umuyobozi akaba n'umutoza wa Les Amis Sportif, imwe mu makipe yo gusiganwa ku magare yo mu Karere ka Rwamagana, yahitanywe n'impanuka.
Iyi mpanuka yabereye mu nzira iva i Musanze igana i Kigali, Rugambwa akaba yavaga Rubavu mu marushanwa yo gutegura abakinnyi bazitabira Tour Du Rwanda ya 2018.
Imana imuhe iruhuko ridashira!
12. Umunyarwanda yakoze amateka mu marushanwa Nyafurika muri Karate
Mu marushanwa Nyafurika y'ingimbi ndetse n'abakuru (Junior & senior) yaberaga mu Rwanda, Ndutiye Shyaka Maic Umunyarwanda wakinnye mu batarengeje ibiro 53, yatsinze umunya Misiri ku mukino wa Nyuma, ahita yegukana umudari wa Zahabu.
Shyaka w'imyaka 17 y'amavuko, ni umwe mu bakinnyi 35 bari bagarariye Amavubi ya Karate, yahatanaga muri aya marushanwa yitabiriwe n'ibihugu 26.
11. Nyirarukundo Salome yandikiye amateka muri CANADA
2018 kandi isize mu irushanwa ryo gusiganwa ku maguru ryabereye i Montréal muri CANADA, Umunyarwandakazi Nyirarukundo Salome aryegukanye aza k'umwanya wa mbere.
Iri rushanwa ryitabiriwe n'ibihugu 61 harimo n'u Rwanda; Nyirarukundo Salome yakoresheje amasaha 2, iminota 28 n'amasegonda abiri, aba aciye agahigo ko kuba ari we ukoresheje ibihe bito mu mateka y'iri siganwa, ndetse anahembwa ibihumbi 11 by'amadollars (9,691,258 RWF).
10. Ikipe ya Benediction yemewe na UCI
Uyu mwaka wa 2018 usize ikipe y'amagare Benediction Club y'i Rubavu yamaze kwemerwa n'Ishyirahamwe ry'Umukino w'Amagare ku Isi (UCI) nk'ikipe iri mu cyiciro cya cya gatatu kizwi nka Continental
Iyi kipe ikaba yari isanzwe ikina amarushanwa atandukanye muri Afurika cyane cyane ay'abatarabigize umwuga, aho yakinaga nk'ikipe yemewe n'Ishyirahamwe ry'Umukino w'Amagare mu Rwanda ariko itujuje ibisabwa kugira ngo yemerwe na UCI.
Ishyirahamwe ry'Umukino w'Amagare ku Isi rishyira amakipe mu byiciro bitandukanye bitewe n'ubushobozi n'amikoro byayo. Ikiciro cya ‘Continental Team' aricyo Benediction Club yinjiyemo umuntu yakigereranya n'icyiciro cya gatatu, hejuru yacyo hari ‘UCI Professional Continental Team' cyangwa se icyiciro cya kabiri naho icyiciro cya mbere kikitwa ‘World Tour' cyangwa ‘UCI Pro Team'.
9. Rtd. Brig. Gen. Sekamana yatorewe kuyobora Ferwafa
Rtd. Brig. Gen Sekamana Jean Damascène yatorewe kuyobora Ishyirahamwe ry'Umupira w'amaguru mu Rwanda Ferwafa muri manda y'imyaka ine atsinze Rurangirwa Louis bari bahanganiye uyu mwanya.
Aya matora yo kuwa Gatandatu tariki ya 31 Werurwe 2018, yabaye asubiwemo nyuma y'aho abanza yari yabaye ku wa 30 Ukuboza 2017 yarangiye habuze utsinze hagati ya Nzamwita Vincent De Gaulle na Rwemalika Félicité.
Brig. Gen. Sekamana wari uherutse gusezererwa mu gisirikare, yatsinze ku majwi 45 mu gihe Rurangirwa bari bahanganye yagize amajwi arindwi, imfabusa iba imwe.
8. Mukura vs yitwaye neza mu mikino nyafurika
Ikipe ya Mukura Victory Sports uyu mwaka wa 2018 yabashije gukora iyo bwabaga yitwara neza mu kino nyafurika ya Caf Confederation cup aho yarenze ibyiciro bibiri bibanza nyuma yo gutsindira I Huye ikipe ya Free state stars yo muri South Africa igitego kimwe k'ubusa mu gihe umukino ubanza muri kiriya gihugu byari ubusa k'ubusa.
Umukino ukurikira MVS kandi yakuyemo kuri penaliti 5-4 ikipe ya El Hilal Sports Club El Obeid yo muri Soudan kuko umukino nabwo ubanza Mukura yari yanganyirijeyo ubusa k'ubusa. Mukura ikaba izahura na Alhly yo mu gihugu cya Soudan niyikuramo ihite ijya mu matsinda ikore amateka nk'aya Rayon Sports nayo yayakoze uyu mwaka.
7. Uwacu Jilienne wari Minisitiri wa MINISPOC yarahinduwe
Ni nyuma y'uko ku mugoroba wo ku wakane tariki ya 18 Ukwakira 2018, Perezida Kagame mu bubasha ahabwa n'amategeko yaraye avuguruye Guverinoma, agasimbuza Uwacu Julienne wari Minisitiri wa Siporo n'umuco hagashyirwamo Minisitiri Nyirasafari Esperance wari Minisitiri w'Uburinganire n'iterambere ry'umuryango.
6. Aimable Bayingana yatorewe kuyobora impuzamashyirahamwe y'Umukino w'Amagare muri OIF
Mu matora yabereye ku kicaro cy'Ishyirahamwe ry'umukino w'amagare mu Bufaransa FF Cyclisme Aimable Bayingana usanzwe ayobora ishyirahamwe ry'umukino w'Amagare mu Rwanda, yatorewe kuyobora impuzamashyirahamwe y'umukino w'Amagare muri Francophonie ku rwego rw'isi .
Aimable Bayingana yatorewe uyu mwanya kuwa gatandatu tariki ya 19 Ukwakira 2018, asimbuye kuri uyu mwanya Umunya Maroc Maitre Mohammed Ben El Mohi wawuyoboraga kuva washingwa mu 2013.
5. Djihad Bizimana yaciye agahigo
Umukinnyi w'ikipe y'igihugu Amavubi Djihad Bizimana uyu mwaka usize ariwe mukinnyi waciye agahigo mu bakinnyi bose b'abanyarwanda baguzwe amafaranga menshi bava mu ikipe iyo ariyo yose ajya mu yindi.Bizimana yaguzwe na Waasland-Beveren yo mu gihugu cy'ububiligi mu kiciro cya mbere agurwa amafaranga ibihumbi 200 by'AmaEuro asaga miliyoni 209 z'Amanyarwanda.Djihad yaguzwe aturutse mu ikipe ya APR Fc asinya imyaka 3.
4. Arsenal FC yasinye amasezerano yo kwamamaza ubukerarugendo bw'u Rwanda
Urwego rw'igihugu rw'iterambere, RDB, uyu mwaka kandi wa 2018, rwatangaje ko rwagiranye amasezerano y'imyaka itatu y'ubufatanye n'ikipe ya Arsenal FC yo mu kiciro cya mbere mu Bwongereza yo gukangurira abatuye Isi kuza gusura u Rwanda hagamijwe guteza imbere ubukerarugendo.
Aya masezerano yashyizweho umukono tariki ya 22 Gicurasi 2018, avuga ko abakinnyi ba Arsenal FC bazajya bambara imipira yanditseho amagambo y'icyongereza ”Visit Rwanda” bisobanuye ”Sura u Rwanda” ku kuboko kw'ibumoso ku myenda y'ikipe ya mbere y'abatarengeje 23 n'iy'abagore ya Arsenal.
Muri aya masezerano, ‘Visit Rwanda' izajya igaragara no ku byapa no kuri za televiziyo zo kwamamaza ziri ku kibuga cya Arsenal, mu cyumba gifatirwaho ikiganiro cy'abatoza ba Arsenal n'abanyamakuru no ku mbuga nkoranyambaga z'iyi kipe.
3. Mu mukino w'Amavubi na Guinea indirimbo zubahiriza ibihugu zabuze
Uyu mwaka kandi wanasize agashya kakozwe ku mukino w'ikipe y'igihugu Amavubi yahuragamo na Guinea aho indirimbo zubahiriza ibihugu byombi zabuze. Bimenyerewe ko mu mikino y'ibihugu, yaba amarushanwa cyangwa se iya gicuti, igomba kubimburirwa n'indirimbo zubahiriza ibihugu.
Mu mukino wo gushaka itike yo kujya mu gikombe cya Afurika 2019, wahuje ikipe y'igihugu ya Guinea Conakry, n'ikipe y'u Rwanda Amavubi indirimbo yubahiriza igihugu cya Guinea yarabuze, bituma umukino utangira na Rwanda Nziza y'u Rwanda itaririmbwe.
Ahagana mu ma saa 15h30, ubwo umuyobozi w'ibirori (MC) yasabaga abantu guhaguruka ngo haririmbwe indirimbo zubahiriza ibihugu byombi, iya Guinea yabuze hashira iminota nk'itanu DJ ayibuze burundu abafana baricara.
2. Rayon Sports yageze muri ¼ cya Caf Confederations cup
Rayon Sports nyuma yo gutsinda Yanga SC igitego 1-0 mu mukino usoza amatsinda ya CAF Confederation Cup 2018 ; Rayon Sports yahize igera muri ¼ cy'iyi mikino kuko yahise iba iya kabiri mu itsinda D yari irimo n'amanota 9 inyuma ya USM Alger yatsinze Gor Mahia ibitego 2-1 ikagira amanota 11 ku mwanya wa mbere bityo Rayon Sports iba ikipe ya mbere yo mu karere k'ibiyaga bigari ibigezeho.
1. Areruya Joseph yakoze amateka atorwa nk'umukinnyi w'umwaka muri Afurika
Nyuma yo kwegukana amasiganwa abiri akomeye muri Afurika, kwitabira Tour de France y'abatarengeje imyaka 23 no kwegukana umudari muri shampiyona ya Afurika, Areruya Joseph uyu mwaka usize ariwe utowe nk'umukinnyi w'amagare witwaye neza kurusha abandi muri Afurika muri 2018.
Iki gihembo kandi Areruya yacyegukanye nyuma y'andi masiganwa akomeye yatwaye nka La Tropicale Amissa Bongo 2018, Tour de l'Espoir yatumye u Rwanda ruhagararirwa muri Tour de France y'abatarengeje imyaka 23 no gusoreza ku mwanya wa gatatu muri shampiyona ya Afurika.
Machad Richard Nshimiyimana
from Imirasire.com | WebRwanda.com http://bit.ly/2F0fIbv
via IFTTT
No comments:
Post a Comment