Miliyoni 1.8 banduye Virus itera SIDA umwaka ushize, mu Rwanda hari intambwe yatewe

Agakoko gatera SIDA gakomeje guhitana benshi, abandi batari bake bakandura uko bwije uko bukeye, gusa Ishami ry'Umuryango w'Abibumbye rishinzwe kurwanya iki cyorezo rigaragaza ko hari intambwe yatewe mu kugabanya abandura n'abahitanwa n'aka gakoko.

Tariki ya 1 Ukuboza buri mwaka ni umunsi mpuzamahanga wo kurwanya SIDA, Ishami ry'Umuryango w'Abibumbye rishinzwe kurwanya iki cyorezo, UNAIDS yagaragaje ko abagera kuri miliyoni 1.8 banduye iyi ndwara umwaka ushize wa 2016.

Umuryango w'abibumbye ugaragaza ko ubwandu bushya bwa SIDA ku Isi yose bwagabanutse nubwo bidahagije kuko bwavuye kuri 1.9 bukagera kuri 1.7.

Ku bushakashatsi bwashyizwe ahagaragara n'Ishami ry'Umuryango w'Abibumbye rishinzwe kurwanya Virusi itera SIDA rigaragaza ko abantu 5000 bandura buri munsi.

Ubushakashatsi bugaragaza ko Umugabane wa Africa ari wo ugaragaza ubwiyongere bw'ubwandu bushya bwa Virusi Itera SIDA kuko 2/3 by'abandura bava kuri uyu mugabane.

Ubushakashatsi bwa UNAIDS bugaragaza ko kuva muri 2010 kugera 2016, abana bandura bavuka bagabanutseho ½ akaba ari ibintu byo kwishimira no kwizera ko imyumvire y'ababyeyi izakomeza kuzamuka bityo kwandura kw'abana bavuka bikaba byacika burundu.

Abana bandura agakoko gatera Sida bavuye ku bihumbi 300 bagera ku bihumbi 160, ibintu byagaragaje ko imvumvire yo kurandura aka gakoko iri ku rwego rwo hejuru.

UNAIDS kandi igaragaza ko abantu basaga miliyoni 40 babana n'agakoko gatera SIDA kandi imibare ikaba yiyongera buri munsi kuko hari abagikora imibonano mpuzabitsina idakingiye n'abantu banduye aka gakoko.

Abantu bahitanwa n'agakoko gatera SIDA bagabanuteho 50% nyuma yo kuba imiti igabanya ubu bukana iboneka ku buryo bworoshye cyane cyane mu bihugu bikiri mu nzira y'amajyambere.

Kuva Agakoko gatera SIDA kagaragara mu 1981, abagera kuri miliyoni 35 bamaze guhitanwa n'iki cyorezo nk'uko ubushakashatsi bwa UNAIDS bwabigaragaje.

U Rwanda ruhagaze rutse imbere y'icyorezo cya SIDA?

Mu Rwanda abantu bagera kuri 204,899 nibo babana n'agakoko gatera SIDA, kandi babona imiti igabanya ubukana ku buryo bworoshye.

Ikigo cy'Igihugu gishinzwe ubuzima Rwanda, RBC kivuga ko mu myaka 20 ishize abanyarwanda bandura iyi virusi bagabanuteho 82%.

Mu Rwanda abafata imiti igabanya ubukana bari ku kigero cya 90% ugereranije n'abazwi bamaze kwandura iki cyorezo.

Abana bandura agakoko gatera SIDA bavuka bagabanutse ku kigero cyo kwishimira kuko bavuye ku 10% bagera kuri 1.8%, mu gihe ubwandu bushya kuri bo bwagabanutseho 50%.

Abantu bahitanwa n'iki cyorezo bagabanutse ku buryo bugaragara kuko imiti igabanya ubukana itangirwa Ubuntu mu gihugu hose.

Mu 2002 abantu batagera ku 100 ni bo bafataga imiti igabanya ubukana mu gihe kuri ubu abasaga 150.000 bafata imiti igabanya ubukana.

from Makuruki.rw | Amakuru Asesenguye! http://ift.tt/2BqsYQR
via IFTTT