Umuryango FPR-INKOTANYI ufata Imiyoborere myiza n’Ubutabera nk’ishingiro ry’Igihugu gikomeye kandi gitekanye kandi bikaba ari ingobyi y’iterambere ry’umuturage n’iry’Igihugu muri rusange. Ni yo mpamvu, uhora uharanira kwimakaza imiyoborere myiza n’ubutabera bibereye Abanyarwanda kandi bigera kuri bose.
Uyu muryango ugaragaza ko imiyoborere myiza n’ubutabera bizakomeza kwitabwaho mu 2017-2024, binyuze mu gushimangira ingingo zitandukanye nkuko byakozwe mu myaka yashize. Ibyo ni ugusigasira Ubumwe bw’Abanyarwanda, Umutekano no kurinda Igihugu, Ububanyi n’amahanga n’ubutwererane, ubutabera butsura iterambere, kubaka inzego n’ imikorere n’imikoranire yazo n’ibyiciro byihariye.
Ibyagezweho mu miyoborere myiza n’ubutabera mu 2010 -2017
Urwego rw’ Imiyoborere myiza n’Ubutabera rwakomeje kwiyubaka hagamijwe kwihutisha iterambere kuri bose.
Mu kubaka ubumwe bw’Abanyarwanda n’ubukangurambaga ku ndangagaciro zihutisha iterambere: Igipimo cy’ubumwe n’ubwiyunge bw’Abanyarwanda cyarazamutse ndetse kirenga 92% mu 2016 kivuye kuri 82% mu 2010;
Hashyizweho gahunda ya « Ndi Umunyarwanda » n’iy’Abarinzi b’Igihango, zafashije Abanyarwanda mu gushimangira ubumwe n’ubwiyunge. Inzego z’umutekano zose zongerewe ubushobozi, bituma zirushaho gukora neza no kugeza ku Banyarwanda umutekano usesuye:
Mu ruhando mpuzamahanga, u Rwanda ubu ruri ku mwanya wa mbere muri Afurika, rukaba urwa 5 ku Isi, mu kugira umutekano usesuye, haba ku manywa cyangwa n’ijoro;
Igipimo cy’uko Abanyarwanda bishimiye umutekano wabo n’ibyabo cyariyongereye; ubu kiri kuri 92%. Icyizere Abanyarwanda bafitiye inzego z’umutekano na cyo cyarazamutse : 99% ku ngabo z’Igihugu na 97.6% kuri Polisi y’Igihugu. Mu bubanyi n’amahanga n’ubutwererane:
Umubare w’Ambasadi z’ u Rwanda mu mahanga wikubye hafi kabiri; ziganjemo cyane cyane izo muri Afurika; Umubare wose w’Ambasade ni 34 na Biro z’abahagarariye inyungu z’u Rwanda mu mahanga (consulates) ni 37 ;
U Rwanda ruri ku mwanya wa gatanu ku Isi mu bihugu byohereza ingabo zabyo mu kubungabunga amahoro ku isi;
RwandAir yaguye amarembo y’ u Rwanda mu mahanga, ubu ikaba igera mu migi 21 yo ku Isi;
Abanyarwanda baba mu mahanga barushijeho kwiyumva mu Gihugu cyabo, binyujijwe muri gahunda zitandukanye, nka « Rwanda Day » na “Come and see”.
Mu butabera
Hongerewe imbaraga muri gahunda zo kwegereza abaturage ubutabera (Abunzi, Inteko z’abaturage, MAJ), bituma abaturage bishimira serivisi z’ubutabera biyongera, ubu akaba ari 76.7%;
Havugururwe amategeko menshi agamije kwihutisha iterambere n’imibereho myiza y’Abanyarwanda, harimo Itegeko rigenga Abantu n’Umuryango, Itegeko rigamije guteza imbere no korohereza ishoramari, Itegeko rigenga Ubutaka mu Rwanda, n’andi;
Hatangijwe uburyo bushya bw’ikoranabuhanga bwo kwihutisha ubutabera ndetse u Rwanda rubihererwa igihembo ku rwego rw’ Afurika;
Ibirarane by’imanza mu nkiko byagabanutseho 70% kuva mu 2011/12 kugeza mu 2015/16. Mu mikorere n’imikoranire:
U Rwanda ubu ni Igihugu cya mbere ku Isi cyakoze impinduka zirwanya ruswa. Ubu abaturage 87.9% bemeza ko batigeze bahura na ruswa mugihe cy’umwaka wose ;
Gahunda yo kwegereza ubuyobozi n’ubushobozi abaturage yongerewe imbaraga, Ingengo y’imari izigenerwa yikubye inshuro zirenga 3, bituma abaturage barushaho kwihuta mu iterambere;
U Rwanda ruri mu bihugu biza ku isonga mu miyoborere izamura imibereho myiza y’abaturage; u Rwanda ni urwa kabiri muri Afurika mu kugira amategeko yorohereza ishoramari, rukaba urwa karindwi ku isi mu kugira Leta ikora neza;
Ibizakorwa
Mu bumwe bw’abanyarwanda
Hazashimangirwa ubumwe bw’Abanyarwanda, baharanira kugira Igihugu gikomeye kandi gitekanye:
Hazashyirwa imbaraga mu gutoza no kwigisha mu mashuri no mu miryango, indangagaciro n’umuco w’ubunyangamugayo (integrity), ubwizerane, kwanga akarengane no kuzirana na ruswa mu Banyarwanda, cyane cyane abakiri bato.
Hazakomeza kwimakazwa ubumwe n’ubwiyunge mu Banyarwanda, hashyirwa imbaraga muri gahunda ya « Ndi Umunyarwanda », Abarinzi b’Igihango no komora ibikomere byasizwe na Jenoside yakorewe Abatutsi.
Gahunda zo kurwanya ingengabitekerezo ya Jenoside mu Banyarwanda n’ahandi hose igaragara zizakomeza kongerwamo imbaraga.
Izi mbaraga kandi ziazongerwa mu guteza imbere uburinganire hagati y’abagore n’abagabo, Abanyarwanda bahabwe amahirwe angana, hanatezwa imbere umuco wo kuzamura abafite intege nke.
FPR ikomeza ivuga ko izubaka iigo cy’Itorero ry’Igihugu cy’icyitegererezo ku rwego rw’Igihugu, hanubakwe ikindi kigo-nyunganizi muri buri Ntara, kugira ngo bifashe kuzamura imyumvire itsura iterambere no kwigira
Umutekano no kurinda igihugu
Uyu muryango usezeranya guharanira kugira inzego z’umutekano zifite ubushobozi bwo gukomeza guha Abanyarwanda umutekano usesuye, kurinda Igihugu no kugira uruhare mu iterambere ryacyo.
Imbaraga zindi zizongerwa mu kubaka ubushobozi bw’inzego z’umutekano zose (inzego za Gisirikare, iza Polisi n’iza NISS), harimo no kuzishakira ubushobozi bwihariye, butuma zishobora kuzuza neza inshingano zazo.
Izo kandi zizongerwa mu mutekano w’abantu n’ibintu ushingiye ku baturage mu midugudu, ku bufatanye n’inzego z’umutekano.
Hazaharanirwa ko ingabo z’Igihugu n’izindi nzego z’umutekano zongera uruhare rwazo mu bikorwa by’iterambere, cyane cyane iterambere ry’imigi yunganira Kigali, iry’inganda, indi mishinga minini irebana n’ubuhinzi n’ubworozi bigezweho.
Muri uru rwego rwo kongera imbaraga bizakomeza bijyana no kwagura ubufatanye n’izindi nzego z’umutekano zo mu bindi bihugu, hibandwa mu gukumira no kurwanya ibyaha nyambukanyamipaka, kurwanya icuruzwa ry’abantu, ibyaha by’ikoranabuhanga binyunyuza ubukungu n’icuruzwa ry’ibiyobyabwenge
Hazongerwa imbaraga mu kubaka mu nzego z’umutekano zose umuco n’indangagaciro z’ubudasumbwa mu gukunda Igihugu, mu kugikorera, kugihesha agaciro no gushyira imbere umuturage.
Ububanyi n’amahanga n’ubutwererane
Umuryango FPR Inkotanyi uzakomeza gushyira imbaraga muri dipolomasi itsura iterambere ry’u Rwanda n’iry’ Afurika.
Mu bizakorwa hazashimangirwa ububanyi n’amahanga n’ubutwererane buteza imbere ishoramari, ubukerarugendo no kwagura isoko ry’ibikorerwa mu Rwanda.
Uzongera kandi imbaraga mu gushishikariza Abanyarwanda batuye mu mahanga ubumwe n’ubwiyunge, kwitabira ibikorwa biteza imbere u Rwanda, gukomeza kurushakira inshuti, no kwagura serivisi bahabwa.
Uzamenyekanisha umwimerere Nyarwanda mu kwishakamo ibisubizo, kugira ngo byifashishwe n’ibindi bihugu by’Afurika mu kwikemurira ibibazo.
Ubumwe bw’Abanyafurika n’iterambere ryabo rishingiye ku bufatanye, ubuhahirane biganisha ku kwigira no kugira ijambo kw’Afurika mu ruhando rw’amahanga bizakomeza guharanirwa.
Hazongerwa imbaraga mu gutanga umusanzu mu guharanira amahoro n’iterambere muri Afurika no ku Isi, kandi haharanirwe ko abasirikare n’abapolisi b’u Rwanda bari mu butumwa bwo kurinda amahoro, bakomeza kuba indashyikirwa mu bikorwa by’ubutabazi no kugarura amahoro aho bari.
UBUTABERA
Hazashyirwaho amategeko afasha kwihutisha iterambere, yubahirizwe, kugira ngo habeho inzego zikora neza, kandi zigirirwe icyizere kurushaho. Kuri iyi ngingo kandi hazashyirwaho, hanavugururwe amategeko ateza imbere imibanire myiza mu miryango y’Abanyarwanda, ashingiye ku muco nyarwanda kandi ajyanye n’igihe.
Uzongera imbaraga mu guca akarengane no gukemura ibibazo by’abaturage, no kurangiza vuba imanza zaciriwe mu nkiko.
Ibyo bizajyana no gushyigikira umuco wo gukemurira ibibazo mu muryango, hashimangirwe ingamba zo gucyemura amakimbirane, bitanyuze mu nkiko, hifashishijwe inteko z’abaturage, Abunzi na serivisi z’ubujyanama mu by’amategeko (MAJ).
Imbaraga zindi zizongerwa mu gukumira no guhana ibyaha bya ruswa no kunyereza umutungo w’Igihugu ku buryo bwihanukiriye, kandi ibyo byaha ntibigire ubusaze.
Zizongerwa kandi mu kubaka inzego zikorana neza, kandi zishishikajwe no kwihutisha iterambere ry’umuturage, mu kubaka ubushobozi bw’inzego za Leta no kuziremamo umuco wo gushyashyanira abaturage n’abazigana, hagamijwe gutanga serivisi zinoze kandi zihuse, mu kubaka uburyo bw’ikoranabuhanga butuma hatangwa serivisi mu buryo bwihuse kandi bworohereza abaturage kugira uruhare muri politiki z’Igihugu.
Urundi rwego ruzakomeza kongerwamo imbaraga ni mu kunoza imishinga mbere y’uko ishyirwa mu bikorwa, hashyirweho uburyo buhoraho bw’Ikurikiranabikorwa n’ubw’isuzumabikorwa.
Hazongererwa ubushobozi n’ububasha inzego zishinzwe gukurikirana no gucunga umutungo wa Leta, gusuzuma ibikorwa no kunoza imikorere y’inzego, kugira ngo zifashe mu kwihutisha iterambere.
Imikorere n’imikoranire y’inzego za Leta n’ibyiciro byihariye
Uyu muryango uzakomeza kwimakaza umuco w’ubufatanye mu Banyarwanda, hashyirwa imbere imikoranire myiza n’ibyiciro byihariye, kugira ngo habeho iterambere ry’Igihugu no ku kwigira k’umuturage.
Abagore n’urubyiruko bazashishikarizwa gukomeza kugira uruhare mu iterambere n’imiyoborere by’Igihugu, baharanira kwihangira imirimo no gufasha abandi Banyarwanda;
Hazanozwa imikoranire, hatezwe imbere ubufatanye hagati ya Leta, Abikorera, Itangazamakuru, Imiryango itari iya Leta n’Imiryango ishingiye ku myemerere, hagamijwe kwihutisha iterambere ry’Igihugu n’imibereho myiza y’abaturage.
Imbaraga zizongerwa mu guteza imbere umuco wo guharanira kwigira mu Banyarwanda, gukorera hamwe, no kwishakamo ibisubizo by’ibibazo byabo.
Ikindi kizaharanirwa ni uko za koperative zigira imiyoborere n’imikorere myiza, bizira ubuhemu kugira ngo azamure abaturage bayajyamo;
Imbaraga zindi zizongerwa mu guteza imbere ubushakashatsi butanga ibisubizo ku bibazo by’imibereho y’abaturage n’ubukungu bw’Igihugu kandi bigahinduka umuco
Gahunda y’Urugerero mu Itorero ry’Igihugu izavugururwa, hagamijwe kubaka urubyiruko rw’Abanyarwanda rufite inyota yo kwigira, gukunda umurimo, kwigirira icyizere, kandi rushishikajwe no gutanga umusanzu mu gukemura ibibazo by’Igihugu.
Uyu muryango ukomeza uvuga muri iyi myaka irindwi ishize, u Rwanda rwageze ku bikorwa byinshi bishimishije mu byiciro bine byubakiyeho gahunda za Leta, mu bukungu, Imibereho myiza y’abaturage, Imiyoborere myiza n’Ubutabera.
Ibi byose byagezweho bishingiye ku migabo n’imigambi by’Umuryango FPR-INKOTANYI ngo utigeze utezukaho, kandi wakomeje kuba ku isonga mu guharanira ko ibyo bikorwa bigerwaho. Ni yo mpamvu, muri iyi myaka irindwi iri imbere, Umuryango FPR-INKOTANYI uzakomeza kubakira ku migabo n’imigambi yawo, kugira ngo ugeze ku Banyarwanda Iterambere ryihuse kandi rirambye.
Ibyo ngo bizakorwa hibandwa kugira Umunyarwanda ushoboye kandi ufite icyizere cyo kubaho, kandi urangwa n’umuco wo kwihesha agaciro, kwigira no gusigasira ibyagezweho. Tugire Igihugu gitekanye, gikungahaye, cy’Abaturage babayeho neza !!!
Kanda hano ujye ubona amakuru yihuse kandi kugihe kuri Facebook no kuri twitter
Ntakirutimana Deus
from bwiza http://ift.tt/2vmXECv
via IFTTT
No comments:
Post a Comment