Gasabo – Mu nkuru twabagejejeho kuwa mbere y’uwitwa Aline w’imyaka 17 n’umwana we w’umwka umwe bari bamaze ibyumweru bibiri bangiwe gusohoka ku bitaro bya Masaka kuko yabuze ubwishyu, kuwa gatatu bahise bamurekura arataha.
Ku bitaro bya Masaka kimwe n’ibindi bitaro bimwe na bimwe bakunze kugira ikibazo cy’abarwayi bivuza bakabura ubwishyu. Abaharanira uburenganzira bwa muntu basanga umuti atari ugufungira kwa muganga ababuze ubwishyu
Aline ubu ari iwabo mu murenge wa Rusororo nyuma y’ibyumweru bibiri ari kwa muganga kandi umwana yari yajyanye kuvuza yarakize ariko akabura amafranga ibihumbi 70 yaciwe kuko nta bwisungane mu kwivuza yari afite.
Amakuru agera k’Umuseke aremeza ko ibitaro bya Masaka byashyizweho igitutu n’ubuyobozi bw’Akarere nabwo bubisabwe n’ Urwego rushinzwe kugenzura iyubahirizwa ry’uburinganire n’ubwuzuzanye bw’abagore n’abagabo mu iterambere ry’igihugu(Gender Monitoring Office).
Aline aho ari iwabo yabwiye Umuseke ko bamurekuye agataha kuri uyu wa gatatu, nubwo bwose ngo hari bamwe mu bakozi ku bitaro bamubwiye nabi ngo ‘yarabareze’.
Aline kandi avuga ko ubu yishimiye ko agiye guhita abona kashi yo kongerera agaciro ubwisungane bwe mu kwivuza ku buryo atazasubira kwa muganga ntabwo afite.
Yari yagiye kuvuza umwana we mu gihe yari atarabasha kubona kashi yongera agaciro ka mutuel de sante ye.
Abantu banyuranye barimo n’umuryango uharanira uburenganzira bwa muntu bari bagaye uburyo uyu mwana yari yarahejejwe kwa muganga kubera kubura ubwishyu bw’ibitaro nyuma y’uko umwana we avuwe malaria no gucibwamo.
Ubusanzwe nta muntu cyangwa urwego rufite uburenganzira bwo gufungira umuntu uwo ariwe wese ahantu aho ariho hose uretse inzego za Police y’igihugu nk’uko umwe mu bakozi b’Umuryango CLADHO ushinzwe gukurikina ko uburenganzira bw’abana bwubahirizwa yabwiye Umuseke.
Aline n’umwana we bari barangiwe gusohoka mu bitaro bya Masaka ubu bararekuwe
Jean Pierre NIZEYIMANA
UMUSEKE.RW
from UMUSEKE http://ift.tt/2eJPb2Z
No comments:
Post a Comment