Nubwo azwi cyane kuri Nelson Mandera, yatabarutse afite amazina arindwi kandi yose afite ubusobanuro bwihariye n'amateka yayo y'umwihariko. Amazina ye yose ni Nelson Rolihlahla Madiba Tata Khulu Dalibhunga Mandela.
Umuryango wa Nelson Mandera Foundation uyu Nyakwigendera Nelson Mandela yasize ashinze ukunda kwandika utuntu twinshi ku mateka y'iyi ntwari abandi bita umubyeyi wa Afurika.
Mu byo bamwanditseho mu munsi ishize, harimo amateka n'ibisobanuro by'amazina ye. Abagize uyu muryango bavuga ko ushobora gukoresha rimwe muri ayo mazina uvuga kuri nyakwigendera ariko kuri bo ngo ni byiza kurikoresha uzi amateka n'ibisobanuro byayo.
Amateka ku mazina ye
Rolihlahla: Iri ni ryo zina yiswe na se mbere y'ayandi yose akivuka. Mu kirimi cyo mu gace yavukiyemo iri zina ngo risobanura umuntu uzateza impagarara.
Nelson : Iri zina yaryiswe ku munsi we wa mbwere wo kwinjira mu ishuri, yaryizwe n'umwarimu we wa mbere witwaga Mdingane. Mu gihe Nelson Mandela yari akiri umwana, Muri Afurika y'Epfo hariyo umuco wo gufata abana b'abanyafurika bakabaha amazina y'icyongereza kugirango byorohere abazungu kubahamagara. Ngo ibi byazanwe n'abakoloni b'abongereza. Gusa ngo nta mpamvu y'umwihariko izwi yatumye uyu mwarimu we amuhitiramo kwitwa Nelson.
Madiba : Iri ni izina ry'ubwoko (Clan) Mandela yabarizwagamo. Muri iki gihugu ngo kera byari umuco kwita amazina afite inkomoko ku bakurambere babo. Bityo ngo iri zina yarihawe kuko ari iry'umukurambere w'ubwoko bw'aba Thembu Mandela akomokamo.
Tata : Iri zina mu rurimi rw'aho Mandela yavukiye risobanura "umubyeyi", Iri ni ryo abanya-Afurika y'Epfo bamuhimbye kuko bamufataga nk'umubyeyi w'igihugu cyabo.
Khulu : Iri na ryo yarihawe na rubanda. Risobanura umuntu w'ingenzi, intwari, inkingi ya mwaba. Gusa mu rurimi rw'aho Mandera akomoka Khulu ngo ni impine y'ijambo “Tat'omkhulu” risobanura "sogokuru".
Dalibhunga : Iri zina ngo Mandela yaryiswe afite imyaka 16, risobanura uwatangije ihuriro/inama uwazanye igitekerezo cyo guhurira mu biganiro. Raturutse ku buryo yakuranye umwuka wo guhuza abantu basanzwe barebana ay'ingwe.
Nubwo aya avuzwe hejuru ari yo mazina azwi cyane hari abo mu muryango we bamuhimbaga utundi tubyiniriro. Nk'umwuzukuru we witwa Graça Machel yakundaga kumwita Papa.
Utundi tuntu tw'amatsiko wamenya kuri Nelson Mandela
Nyakwigendera Nelson Mandela yatabarutse afite imyaka 95, kuwa 5 Ukuboza 2013.
Nelson Mandela yatabarutse ari intwari, yarwanyije ivanguramoko rishingiye ku ruhu muri Afurika y'Epfo ryakorerwaga abirabura rizwi ku izina rya "Apartheid".
Kurwanya ivangura kwe kwatumye abazungu bamufunga mu 1964. Nelson Mandela yagiye ahindurirwa gereza ndetse yongerezwa n'ibihano kugeza igihe bafashe icyemezo cyo kumufunga burundu.
Mu 1990, ubwo ANC ( ishyaka ryarwanyaga ubutegetsi bw'igitugu bwa Apartheid) yemerwaga n'amategeko, Mandela yahise afungurwa amazemo imyaka 27.
Mu1994 yatorewe kuba Perezida w'Afurika y'Epfo,
Mu 1993 yahawe igihembo cy'amahoro cyitiriwe Nobel
Niwe mwirabura wa mbere wayoboye Afurika y'Epfo
Yayoboye manda imwe rukumbi maze aharira abandi
Yavutse ku itariki 18 Nyakanga 1918 avukira muri Cap y'Iburasirazuba
Se yapfuye akiri umwana muto
Itariki 18 Nyakanga ni umunsi mpuzamahanga witiriwe Mandela washyizweho na Loni
from Makuruki.rw | Amakuru Asesenguye! http://ift.tt/2eJKciN
via IFTTT
No comments:
Post a Comment