Ndi umushomeri, Umugabo wa mukuru wanjye ansaba kuryamana na we akazandihirira kaminuza-Nkore iki?

Maze imyaka ibiri ndangije kwiga segonderi, mba kwa mukuru wa njye i Kigali, nta kazi ngira kampemba nirirwa mu rugo nkora uturimo dusanzwe, bakunzi ba bwiza.com nkaba nifuza ko mwangira inama.

Umugore atahira rimwe nimugoroba, umugabo aza kuruhuka saa sita agasubira ku kazi saa munani, urebye ni njye utegura amafunguro saa sita, ni nayo masaha abona yo kugira ibyo anganiriza birimo no kuba akomeje kunsaba ko turyamana, ariko narabyanze.

Namubwiye ko ntabikora, ko naba nsenyeye mukuru wanjye kandi n’ubundi ari we muvandi mwe ngira, gusa yabuze icyo yakora ngo agere ku ngingo, gusa muri iyi minsi akomeje kumbwira ngo kuva narabuze akazi ninemere turyamane arebe uko yandihirira kaminuza.

Kwaba kwiga iyo kaminuza ndabishaka, ariko nkasanga n’ubundi naba ngiye kuba umugore we wa kabiri, mukuru wa njye akaba mukeba wa njye, kandi kumusenyera ni njye waba wisenyeye.

Dore ikibazo mfite nshaka ko mungiramo inama, sinshaka ko mukuru wa njye amenya ko umugabo we asigaye ansaba kuryamana na we, kandi mbona nimpaguma bizaba ibibazo, kuko uwo mugabo nsigaye mbona atakinyishimiye nka mbere, kandi ninigendera bazambaza igitumye ngenda, mungire inama y’inzira nzabinyuzamo ngo mve muri uru rugo kandi ntahasize ibibazo.

Kanda hano ujye ubona amakuru yihuse kandi kugihe kuri Facebook no kuri twitter

@Bwiza.com

from bwiza http://ift.tt/2fRWFBU
via IFTTT