Icyo ishyaka FDU-Inkingi rivuga ku bayobozi bayo batawe muri yombi

Abayobozi batandukanye mu mashyaka abiri atavuga rumwe n’ubutegetsi mu Rwanda ariko atemerewe gukorera mu Rwanda, batawe muri yombi nk’uko byemejwe n’abayobozi batavuga ruwme n’ubutegetsi ndetse n’igipolisi kuri uyu wa Kane.

Itangazo ryaturutse mu ishyaka FDU-Inkingi rya Victoire Ingabire kuri ubu ubarizwa muri gereza kuva mu 2013 azira ibyaha byo guhakana jenoside n’iterabwoba, rivuga ko abayobozi bakuru batatu muri iri shyaka barimo visi perezida, Boniface Twagirimana, batawe muri yombi kuwa gatatu bari kumwe n’umukozi w’iri shyaka ndetse n’uwari ushinzwe umuutekano.

Umuvugizi w’iri shyaka, Justin Bahunga wasohoreye iri tangazo mu Bwongereza aho ari mu buhungiro, yamaganye iri tabwa muri yombi yise gutera ubwoba abayoboke babo.

Yagize ati: “Iri tabwa muri yombi rije nyuma y’iry’umuryango wa Diane rwigara kandi rigamije gucecekesha burundu amajwi y’abatavuga rumwe baharanira demokarasi mu Rwanda”.

Irindi shyaka ritavuga rumwe n’ubutegetsi ritaremererwa gukorera mu Rwanda, PDP- Imanzi, naryo ritangaza ko visi perezida waryo, Jean Marie Vianney Kayumba yatawe muri yombi.

Kuri uyu wa Gatatu ushize igipolisi kikaba kivuga ko cyataye muri yombi abantu 7 bakekwaho gukorana n’imitwe yitwaje intwaro ikorera mu gihugu cy’abaturanyi.

Bane mu bafashwe nk’uko byemezwa n’Igipolisi cy’u Rwanda ni abo muri FDU-Inkingi.

Polisi ivuga ko mu batawe muri yombi harimo babatu bafatiwe mu Burengerazuba bari kujya mu myitozo ya gisirikare hanze y’u Rwanda.

Umuvugizi wa Polisi, ACP Theos Badege akaba yatangaje ko amakuru yatanzwe n’abo batatu bari bamaze gufatwa ni yo yatumye Polisi ikora igikorwa cyo gusaka mu ntara y’Uburengerazuba no mu mujyi wa Kigali maze hafatwa abandi bane bakekwaho kuba ari bo bakoraga igikorwa cy’ubukangurambaga no kwinjiza urubyiruko muri ibyo bikorwa.

Mu myaka yashize, ubutabera bw’u Rwanda nabwo bukaba bwarashinjije umuyobozi wa FDU-Inkingi, Victoire Ingabire, gukorana n’umutwe wa FDLR umaze imyaka myinshi ukorera mu burasirazuba bwa Congo.

 

Kanda hano ubone amakuru yihuse kandi ku gihe kuri Facebook no kuri twitter

 

Dennis Ns./Bwiza.com

 

 

 

from bwiza http://ift.tt/2vRTHaK
via IFTTT