Gatsibo: Abahoze ari abarimu bamaze imyaka isaga 8 bategereje ibirarane

Abahagaritswe mu bwarimu kubera impamyabumenyi zo ku rwego rwo hasi mu Karere ka Gatsibo mu myaka isaga 8 ishize, ntibarahabwa ibirarane by’imishahara yabo n’imperekeza bemerewe na Leta.

Bavuga ko mu mwaka wa 2009 ari bwo bandikiwe bahagarikwa mu kazi, kubera ko bari bafite impamyabumenyi igihugu kitifuzaga mu burezi.

Abenshi mu bahagaritswe bavuga ko bari bafite impamyabumenyi ya A3 kandi igihugu cyarifuzaga ko abakora mu burezi nibura bagomba kuba bafite impamyabumenyi ya A2.

Muvunyi Albert wigishaga ku kigo cy’amashuri abanza cya Kagera cyo mu Murenge wa Nyagihanga avuga ko ubwo yahagarikwaga Leta yamwijeje kuzamuha amafaranga asaga ibihumbi 500.

Avuga ko Leta yamuhagaritse akemererwa ko azahabwa amafaranga y’ibirarane ndetse n’imperekeza  ariko akaba amaze imyaka umunani ategereje.

Uyu mugabo aganira n’izubarirashe.rw, yavuzeko inzego hafi ya zose yazizengurutse asaba ko za murenganura, aho ageze bakamwizeza ko bagiye kubikemura vuba ariko ntibabikemure.

Ati, “Nakoze mu bwarimu imyaka 17 nza gusezererwa, mu ibaruwa y’akarere yansezereye harimo ibyo batwemereye ariko ntibigeze babikora. Ikibazo twakigejeje ku karere ntikagira icyo babikoraho, tujya ku ntara ntibagira icyo batumarira, nyuma rero ntabwo twicaye twishyize hamwe turi abantu bagera kuri 45 tujya muri Minisiteri y’Uburezi batubwira ko ikibazo bakizi, batwizeza ko kizakemuka turategereza turaheba, tujya muri Komisiyo y’Uburenganzira bwa Muntu batubwira ko bazadufasha, dutegereza ubufasha burabura, tujya ku Muvunyi nabwo bigenda bityo.”

Nabonibo Josephine nawe avuga ko yahagaritswe ntahabwe amafaranga y’ibirarane yemerewe, bityo akaba asaba abayobozi ko bakemura iki kibazo kuko kirambiranye.

Aragira ati “Icyo nifuza ni uko baduha amafaranga y’ibirarane baturimo kuko rwose twe twanakoreye igihugu mu bihe bibi.”

Nkunzimana Alphonse uvuga ko yabaye umwarimu guhera mu mwaka wa 1982 akaza guhagarikwa mu mwaka wa 2009, avuga ko yabariwe ko azahabwa amafaranga 800.000, ariko akaba atarayahabwa.

Gasana Richard, Umuyobozi w’Akarere ka Gatsibo avuga ko ikibazo cy’aba barimu ubuyobozi bw’akarere bukizi, akaba avuga ko aba barimu bagiye bahabwa amafaranga yabo mu byiciro.

Gasana yizeza abasigaye ko harimo gukorwa ibarura rya nyuma, kugira ngo abasigaye na bo babashe kwishyurwa.

Aganira n’izubarirashe.rw, Gasana Richard yagize ati, “Turi ku cyiciro cya gatatu ari na cyo cya nyuma, kugeza uyu munsi ababikora barimo kutubwirako mu mirenge 14, iby’imirenge itanu bimaze kutugeraho kugira ngo tujye kwishyuriza abo bantu, turacyategereje ko n’indi mirenge ibizana tugasuzuma ko byujuje ibisabwa tukanababarira na byo tukabyohereza twihaye y’uko bitarenze uku kwezi ibikiri muri iyo mirenge biba byahageze, hanyuma bikoherezwa ikigari icyo nabizeza ni uko iyo bigeze i Kigali muri Minisiteri y’Imari n’Igenamigambi bakabisuzuma bagasanga byujuje ibisabwa, byarasinywe n’akarere amafaranga yarateganyijwe bahita babishyura.”

Ubuyobozi bw’akarere ka Gatsibo butangaza ko butazi imibare y’abarimu bakeneye guhabwa amafaranga y’ibirarane byabo, kubera ko ibarura ryabo ritararangira.

from Izuba Rirashe http://ift.tt/2xRnZaM
via IFTTT