DRC: Imirwano ku mugi wa Uvira… Mai Mai Yakutumba yateye

Ejo kuwa 27 Nzeri abarwanyi ba Mai Mai bagizwe umutwe witwa National People’s Coalition for the Sovereignty of the Congo (CNPSC) bafashe agace kitwa Kigongo hafi cyane y’umugi wa Uvira mu Ntara ya Kivu y’Epfo. Ingabo za FARDC zaje kubarwanya ntizashoboye kubabuza gukomeza. Imirwano yubuye mu gitondo cyo kuri uyu wa kane mu mugi wa Uvira. 

Mu mugi wa Uvira kuva ejo nijoro na mugitondo uyu munsi hari imirwano ya FARDC na ba Mai Mai bishyize hamwe

Biravugwa ko abarwanyi bageze muri uyu mugi baciye iy’amazi mu ijoro ryakeye. Nubwo umugi wose ukiri mu maboko y’ingabo za Congo na MONUSCO ariko aba barwanyi baracyari hafi kandi umwuka w’intambara ni wose nk’uko bitangazwa n’uwitwa Suluhu urubuga rw’abanditse n’abashakashatsi bahari.

Mu minsi ishize aba barwanyi bita Mai Mai Yakutumba bateye ahitwa Fizi akandi gace gace kari hafi ya Uvira. Kimwe n’indi mitwe inyuranye yishyize hamwe irarwanya Perezida Kabika ngo wakabaye yaravuye ku butegetsi tariki 19 Ukuboza 2016 ubwo manda ye ya kabiri yarangiraga.

Uyu mutwe wa CNPSC uhurije hamwe imitwe y’abarwanyi myinshi, umwe mu ikomeye muri yo ni uw’aba Mai Mai uyobowe na  William Amuri Yakotumba.

Harimo n’indi mitwe nka Mai-Mai Malaika, Kaka Sawa group n’indi…

Mu gitondo cya none ngo batangiye kwegera Uvira ari benshi amasasu yumvikana ari menshi abantu baguma mu nzu zabo.

Sebastien Muyengo Musenyeri Gatolika muri Uvira yatangarije Reuters ko imbuda ziremereye cyane zumvikanaga kuva ejo nijoro zongeye mu gitondo cya none. Nubwo ngo yaje guhagarara nyuma y’amasaha atandatu.

Ingabo za Congo ngo ziracyafite umugi wa Uvira uri muri 25Km gusa uvuye i Bujumbura mu Burundi  nubwo imirwano icyumvikana hato na hato.

UMUSEKE.RW

from UMUSEKE http://ift.tt/2xzLPKI