Uganda: Yatawe muri yombi azira kwiyita umuvandimwe wa AIGP Kaweesi ashaka indonke

Igipolisi cya Uganda muri Masaka cyataye muri yombi umusore w’imyaka 29 wagendaga yiyita umuvandimwe wa nyakwigendera AIGP Andrew Kaweesi. Uyu witwa Mubarak Mucunguzi, waniyitaga Mubarak Munyagwa, yafatiwe n’abapolisi ahitwa Kayirikiti mu mujyi wa Nyendo.

Umuvugizi w’igipolisi mu karere, Lamech Kigozi, avuga ko uyu yafashwe arimo kwaka amafaranga umuntu ucunga akabari kari mu mujyi yafatiwemo.

Kigozi avuga ko uyu yageze kuri ako kabari avuga ko ari umupolisi wo mu gipolisi cya Masaka, aho yiyitaga Senior Spt. Of Police Kayongo Mubarak, mu gihe ngo muri iki gipolisi harimo n’a Spt witwa Kayongo Hamza, kandi akaba yungirije umukuru w’igipolisi muri Masaka.

Kigozi akomeza avuga ko uwo Mucunguzi yatekeye umutwe yaketse ko arimo kuvugana n’uwungirije umukuru w’igipolisi ubwe nk’uko iyi nkuru dukesha Chimpreports ikomeza ivuga.

Mucunguzi rero ngo akaba yarakangishije gufunga ako kabari kubera ngo ibibazo by’umutekano, ndetse abasha kumvikana na manager w’akabari ko agira amafaranga amuha, aho ngo nyiri akabari yari amaze kumuha 400,000$.

Uyu nyiri akabari ariko ntiyarekeye aho ahubwo yasabye Mucunguzi kumusinyira ko amuhaye ayo mafaranga, hagati aho anahamagara ukuriye igipolisi mu mujyi wa Nyendo ngo aze arebe niba koko azi uyu Mucunguzi mu bapolisi ba Masaka, ari nay o ntandaro yo kumenya ko ari umutekamutwe.

Ubwo ngo yafatwaga yabajijwe niba koko hari isano afitanye na AIGP Andrew Kaweesi nk’uko yagendaga abwira abantu, basanga nta hantu na hamwe ahuriye n’umuryango we.

Uyu rero akaba ashinjwa ibyaha bibiri; icyo kwiyita uwo atari we ndetse no guteka imitwe ashaka kubona amafaranga.

AIGP Andrew Kaweesi wari umuvugizi w’Igipolisi cya Uganda, yiciwe mu gitero yagabweho n’abantu bitwaje imbunda ubwo yari aturutse iwe mu rugo ari kujya ku kazi kuwa 17 Werurwe 2017. Hafashwe abantu benshi bakekwaho uruhare mu iyicwa rye, ariko kugeza ubu ubutabera ntiburemeza ku mugaragaro abahamwa n’icyo cyaha.

 

Kanda hano ujye ubona amakuru yihuse kandi kugihe kuri Facebook no kuri twitter

 

Dennis Ns./Bwiza.com

 

from bwiza http://ift.tt/2wi74Qx
via IFTTT