Impanuka zitandukanye zaberaga mu mihanda y’u Rwanda zatumaga hirya no hino mu gihugu abantu binubira gukora ingendo, n’uzikoze abasigaye bagasigarana impungenge ko atagaruka amahoro.
Mu Kwakira 2016, imbaga y’abantu yateraniye i Bunyogombe mu Murenge wa Ruhango mu muhango wo gushyingura umukobwa wari ufite ubukwe mu mezi make yari imbere, wari umaze iminsi mike asezeranye imbere y’amategeko.
Uyu mukobwa yaguye mu mpanuka yabereye mu Murenge wa Musambira mu karere ka Kamonyi tariki ya 19 Ukwakira 2016, yahitanye abantu 11, ubwo imodoka yo mu bwoko bwa Coaster ifite ibirango RAB 183 U, ya sosiyete itwara abagenzi Horizon Express Ltd, yavaga i Nyanza yerekeza i Kigali, yagonganaga n’ikamyo ifite puraki T957 BBT yo muri Tanzania yerekezaga mu Ntara y’Amajyepfo.
Hakozwe byinshi, Polisi yagerageje guca amagare mu muhanda cyane mu mijyi, ariko nyuma bisuzumwe basanga amagare siyo ateza impanuka awugarurwamo.
Hashyizwe utununga(dos d’annes/humps) mu mihanda itandukanye y’u Rwanda, urugero ni mu muhanda Kicukiro ugana Bugesera, zashyizwemo nyuma y’impanuka zitandukanye zagiye zihabera zirimo ikamyo yabuze feri ikica benshi ndetse n’izindi zitandukanye.
Ibyo byatumye no mu cyafatwaga nk’imihanda mpuzamahanga bamwe bavugaga ko idashyirwamo utu tununga, dushyirwamo mu rwego rwo kugabanya izi mpanuka.
Mu duce twari tuzwiho kuberamo impanuka hagiye hashyirwa ibimenyetso byihariye biburira abashoferi ko bagomba kwitondera aho hantu. Urugero ni ahitwa ku Mukobwa mwiza mu karere ka Huye, aho byavugwaga ko abahagwa baba bakatiye ‘umukobwa usa neza, witambika mu muhanda bakanga kumugonga[bishobora kuba atari ukuri] , I Kabuga mu Mujyi wa Kigali, mu muhanda Kigali- Rubavu, ahitwa kuri Bazirete, i Shyorongi n’ahandi hatandukanye hagiye hashyirwa ibyo byapa.
Hamwe imihanda yagiye isubirwamo, indi irongerwa ngo harebwe ko izo mpanuka zabonerwa igisubizo.
Abantu baragenda mu modoka nta bwoba
Imodoka zitwara abagenzi mu buryo bwa rusange
Ubu abantu baragenda mu modoka rusange zitarwa abagenzi nta bwoba bafite nka mbere, aho wasangaga bamwe batanguranwa kugenda mu myanya yo hagati mu modoka.
Bose barengeraga ubuzima bwabo, bavuga bati “ Nibayigonga ku ruhande harapfa uhari, niba ari imbere harapfa abahicaye. Nituruka inyuma nabwo irahitana abahicaye, ariko hagati ntibapfa kuhagonga.
Ayo niyo yari amakiririro, byageze ndetse n’aho umugore, umugabo n’abana bategaga imodoka zitandukanye, ngo badapfa bose mu gihe imodoka bateze bombi yaramuka ikoze impanuka.
Ubwoba abantu babaga bafite buri kugenda bushira, umuryango uratega imodoka imwe ikawugendamo nta kibazo. Abantu ntibakirwanira kwicara mu myanya, byose biraterwa na Speed Governor cyangwa akagabanyamuvuduko kashyizwe mu binyabiziga.
Aka kavuma, bamwe bita ‘akarengerabuzima’ bagafata nk’igitangaza , kubera uko kahinduye ibintu mu mihanda, kagenwa n’ Iteka rya Perezida n° 25/01 ryo ku wa 25/02/2015 rihindura kandi ryuzuza Iteka rya Perezida n°85/01 ryo ku wa 02/09/2002 rishyiraho amabwiriza rusange agenga imihanda n’uburyo bwo kuyigendamo nk’uko ryahinduwe kandi ryujujwe kugeza ubu.
Muri aya mabwiriza yasohotse mu igazeti ya Leta yo kuwa 26 Gashyantare 2015, mu ngingo ya 2 hagira hati « Imodoka itwara abagenzi ku buryo bwa rusange cyangwa itwara imizigo ntigomba kurenza umuvuduko wa kilometero mirongo itandatu mu isaha (km 60/h).
Imodoka yose itwara abagenzi ku buryo bwa rusange cyangwa itwara imizigo igomba kuba ifite akagabanyamuvuduko kayifasha kutarenza umuvuduko ntarengwa ku muhanda. Utugabanyamuvuduko tugomba kuba dufite ibipimo ngenderwaho byagenwe n’abashinzwe ubuziranenge mu Gihugu.»
Abantu batandukanye bavuga ko ikoreshwa ry’aka kuma ryagabanyije impanuka ku buryo bugaragara. Bamwe iyo bateze imodoka zitwara abagenzi ku buryo bwa rusange, hari abo wumva bavuga bati « Biragaraga ko imodoka ikoze impanuka nta wapfa kubera ko umuvuduko ni muke ku buryo bugaragara. »
Nubwo bitabuza bamwe mu bagenzi kwijujutira uburyo umuvuduko izi modoka zigenderaho ubatinza mu nzira bageraranyije na mbere.
Polisi y’u Rwanda isanga Speed Governors zaratanze umusaruro
Speed Governor
Polisi y’ igihugu ishami rishinzwe umutekano wo mu muhanda yakunze gushyira ku isonga umuvuduko ukabije nk’ impamvu y’ impanuka zica abaturage mu mihanda.
Nyamara ngo nyuma y’ikoreshwa ry’utu tugabanyamuvuduko impanuka zigaregenda zigabanuka nkuko biherutse gutangazwa n’umuvugizi wa Polisi y’ Igihugu, Ishami rishinzwe umutekano wo mu muhanda, CIP Emmanuel Kabanda muri Gicurasi uyu mwaka.
Yagize ati “Ni ukuvuga ngo kuva muri 2016 kuzamura kugeza ubu, usanga abapfaga kubera impanuka z’ imodoka zitwara abagenzi cyangwa iziitwara imizigo bari hagati ya 25 na 30 mu kwezi. ariko ubu aho dushyiriye imbaraga mu gukoresha utugabanyamuvuduko, byagabanuye abo impanuka zica, ubu babarirwa hagati y’ umwe na batanu. ubwo ni ukuvuga ko bagabanutseho nka 30% kuzamura”.
Kabanda kandi yavuze ko aho utu twuma dushyiriwe mu modoka zitwara abantu n’ibintu mu buryo bwa rusange kwezi kwa kabiri uyu mwaka, ibyangizwaga n’impanuka (abantu n’ibintu) byaganutseho 50%.
Kugeza ubu haracyari ikibazo cy’uburangare bw’abashoferi, umunaniro kuri bamwe utuma bakora izi mpanuka, ariko ikibazo cy’umuvuduko ku modoka zitegekewe kugira utu twuma ngo ntizigiteje ikibazo nk’icyariho, gusa hari abavuga ko hari bamwe mu bashoferi bacomokora utu twuma, bagera hafi ya polisi bakongera bakaducomeka.
Kanda hano ujye ubona amakuru yihuse kandi kugihe kuri Facebook no kuri twitter
Ntakirutimana Deus ̸ Bwiza.com
from bwiza http://ift.tt/2vG8ljH
via IFTTT
No comments:
Post a Comment