Tom Rwagasana wa ADEPR yarekuwe by’agateganyo

Urukiko Rukuru rwaraye rurekuye Tom Rwagasana wahoze ari umuvugizi w’Itorero rya ADEPR akaza gutabwa muri yombi ashinjwa ibyaha birimo kunyereza umutungo w’iri torero.

om Rwagasana wari umuvugizi (umuyobozi) wungirije wa ADEPR mu Rwanda

Umuvugizi w’inkiko akaba n’umugenzuzi wazo, Itamwa Emmanuel yabwiye Umuseke ko iki kemezo cyafashwe mu rubanza rusaba kongeza igihe cyo gufungwa by’agateganyo cyariho gisabwa n’Ubushinjacyaha.

Avuga ko iki kifuzo cyo kurekura by’agateganyo Tom Rwagasana cyasabwe n’Ubushinjacyaha kubera uburwayi bukomeye yabugaragarije.

Ati “Byumvikane neza ko atagizwe umwere ku cyaha akurikiranyweho ahubwo ni uko Urukiko rukuru rwasanze agomba gukurikiranwa ari hanze.”

Itamwa avuga ko Urukiko rukuru rwatanze amabwiriza uyu wahoze ari umuyobozi muri ADEPR agomba kubahiriza arimo kwitaba Ubushinjacyaha buri cyumweru.

Urukiko kandi rwategetse ko uregwa atanga ikemezo ke kijya mu mahanga (Passport) ku buryo atarenga imbibi z’u Rwanda.

Uyu muvugizi w’inkiko avuga ko uregwa akomeza gukurikiranwa, igihe cyo kumuburanisha cyagera akaza kuburana nk’abandi.

Mu byifuzo by’uregwa (Tom Rwagasana) yavugaga ko gereza ya afungiwemo itakibashije kumurikirana, anagaragaza impapuro z’ibitaro byitiriwe Umwami Faycal ko afite uburwayi bukomeye.

Tom Rwagasana na bagenzi be barimo Muteyemariya Christine wari umucungamutungo muri ADEPR batawe muri yombi mu ntangiro za Gicurasi, bashinjwa kunyereza umutungo w’iri torero.

Martin NIYONKURU
UMUSEKE.RW

from UMUSEKE http://ift.tt/2vFSRfa