Musanze: Abakora imideri ngo kutagira aho bakorera birabadindiza

Abakora ibijyanye n’imideri barimo abakora amaherena n’abadozi b’imyenda mu karere ka Musanze bavuga ko abenshi bakorera mu ngo batuyemo, bakavuga ko ibi bibadindiza kuko badapfa kubona ababagurira.

Ngo bagaragara mu bihe by’imurikabikorwa gusa

Aba banyabukorikori b’imideri bavuga ko uburyo bakora bisa nko kurwinaho ariko na byo bitababyarira inyungu kuko buri wese akora ari nyamwigendaho.

Bavuga ko uretse gutuma badatera imbere, ubu buryo bakoramo bunatuma badasangizanya ubumenyi kuko ntaho baba bahuriye.

Mukabugingo Angelique ukora amaherena, inigi n’ibikapu yifashishije ibitenge, avuga ko abakora ubukorikori nk’ubu batitabwaho.

Ati “Twumva ngo ahandi hari udukiriro, niba gahari cyangwa kadahari ntabwo tubizi, ariko ntako pe kuko aho bita ngo ni mu gakiriro ni mu basudira n’ababaji gusa, aho rero ni bo bonyine bahakorera kandi nabwo nabo hababanye hato.”

Avuga ko uwabaha aho bakorera hazwi bajya babona abakiliya, bakanahuza ubumenyi n’ubushobozi ku buryo bakwibumbira muri Koperative.

Ati “Kutagira ahazwi wasanga abakora nk’ibyacu bidindiza benshi, hari n’uwakenera gukoresha nk’amaherena yifuza; icyo gihe iyo azi aho ukorera araza akakubwira akaguha komande.

Nkanjye nashatse kubijyamo mbura aho mbyigira mpitamo gusanga umugore ubizi aho akorera iwe nanjye aranyigisha, Ubu nanjye mbikorera iwanjye, imikorere nk’iyi ntaho byageza  abakora uyu mwuga.”

Umuyobozi w’akarere ka Musanze, Habyarimana Jean Damascene yizeza aba banyabukorikori ko bashonje bahishiwe kuko bamaze kugura ahazubakwa akandi gakiriro ku buryo aba na bo bazabona aho bakorera.

Avuga ko ibi bigomba gukorwa mu ngeno y’imari y’uyu mwaka. Ati “Buri rwego rw’ubukorikori n’ubugeni ruzaba rwisanzuye.”

Uyu muyobozi w’akarere ka Musanze avuga ko imirimo yo kubaka aka gakiriro gashya izatangira mu mezi abiri ari imbere. Ati “Twizeye ko izakorwa vuba kuko mu mwaka utaha kazaba kuzuye.”

Meya Habyarimana asaba aba banyabugeni kwibumbira mu mashyirahamwe ku buryo  bitazabatinza mu gihe bazaba bajyanwa gukorera mu gakiriro.

Emile DUSENGE
UMUSEKE.RW/Musanze

from UMUSEKE http://ift.tt/2wiuAfW