Muri Kaminuza y’u Burundi haravugwa umwuka mubi hagati y’abanyeshuri ushobora kuvamo ihangana

Amakuru aturuka mu itangazamakuru ry’u Burundi aravuga ko abanyeshuri bo muri Kaminuza y’u Burundi, muri campus ya Mutanga, babarizwa mu rubyiruko rw’ishyaka CNDD-FDD ruzwi nk’Imbonerakure, bari guhohotera bagenzi babo, aho usanga ngo ari bo bashyiraho amategeko agenga imyitwarire muri kaminuza, ndetse ngo bagakora irondo ninjoro bitwaje impiri ari ko bagenda bakubita bagenzi babo b’abanyeshuri bahuye.

Bivugwa ko buri joro izi Mbonerakure z’abanyeshuri zo muri campus ya Mutanga zikora amarondo muri kaminuza bafite impiri, bakagenda bakubita uwo bahuye nawe, aho ngo bagenda mu dutsiko maze umuntu wese winjiye muri kaminuza anyuze ku muryango uteganye n’agace ka Nyakabiga agakubitwa bamubaza aho avuye, icyo yakoraga n’impamvu atashye ninjoro nk’uko byemezwa n’umwe mu banyeshuri baganiriye na RPA dukesha iyi nkuru.

Uyu munyeshuri akomeza yemeza impamvu z’amoko zaba ari zo zihishe inyuma y’ibi bikorwa, dore ko ngo hari umunyeshuri w’Umututsi wakubiswe n’Imbonerakure zimubwira ko ari igihe cyabo cyo kwihorera. Uyu munyeshuri ngo bamuhatiye kugendesha amavi ahantu harehare. Uyu munyeshuri ati: “Muri campus hari abapolisi ariko ntibajya batabara. Tubakekaho ubufatanye.”

Iyi nkuru ikomeza ivuga ko abanyeshuri batabarizwa muri CNDD-FDD bumva bahangayitse kandi bafite ubwoba ko hashobora kuba ikintu kibi igihe icyo ari cyo cyose. Abanyeshuri benshi badashyigikiye iyo mikorere ngo bafite umujinya, ku buryo ikosa rito rishobora gutuma habaho guhangana gukomeye hagati y’abanyeshuri.

Mu banyeshuri bavugwaho guhohotera bagenzi babo bitwaje ishyaka babarizwamo rya CNDD-FDD, harimo n’uhagarariye abanyeshuri witwa Merthus bivugwa ko ari we utegura ayo marondo, hakabamo uwitwa Desire wiga amategeko muri Bac ya 3 ndetse n’uwitwa Obède wiga mu ishami ry’ibinyabuzima.

Abanyeshuri ba Kaminuza y’u Burundi, Campus ya Mutanga bakaba basaba abayobozi b’ibanze n’abashinzwe umutekano muri campus guhagarika ayo marondo.

 

Kanda hano ujye ubona amakuru yihuse kandi kugihe kuri Facebook no kuri twitter

 

Dennis Ns./Bwiza.com

 

from bwiza http://ift.tt/2vLe0mR
via IFTTT