Igihe: #KwitaIzinaGalaNight: Ibiroro byakusanije akayabo karenga ibihumbi 600 $ azarengera ingagi

Clare Akamanzi uyobora RDB ari mubanejejwe n'imigendekere y'iki gitaramo.

Ku mugoroba wo kuri uyu wa gatandatu, muri Kigali Convention Center habereye ibirori byo gusangira no kwishimira imyagezweho mu kurengera urusobe rw’ibinyabuzima by’umwihariko ingagi, ibirori byinjije arenga ibihumbi 600 by’amadolari ya amerika tugereranyije ayavuye mu matike n’ibyahacururijwe mu cyamunara.

Clare Akamanzi uyobora RDB ari mubanejejwe n’imigendekere y’iki gitaramo.

Ni ibirori byateguwe n’Urwego rw’igihugu gishinzwe iterambere mu Rwanda (RDB) mu rwego rwo gukusanya amafaranga yo gushyira mu kigega cyo kurengera urusobe rw’ibinyabuzima n’ibidukikije (conservation).

Belise Kariza uyobora ishami ry’ubukerarugendo muri RDB yabwiye Umuseke ko amafaranga yakusanijwe muri ibi birori yose ashyirwa mu kigega cya “Conservation”.

Ati “Turanezerewe ko abantu bitabiriye iki gikorwa, kugeza nka saa tanu amatike yose yari yamaze kugurwa, twacuruje amatike 5 000,…amafaranga yavuyemo arajya mu kigega asangamo andi miliyoni 30 Frw twakuye mu gikorwa nk’iki umwaka ushize.”

RDB ivuga ko by’ubwihariko amafaranga yavuye muri iki gikorwa azajya mu kongera icyanya cy’ingagi zibamo dore ko zigenda ziyongera buri mwaka.

Iki gikorwa gisa nk’aho aricyo gitangiza ibikorwa byo kwita izina bimara hafi icyumweru cyitabiriwe na Perezida w’urukiko rw’ikirenga Sam Rugege wanitabiriye icy’umwaka ushize, Minisitiri Francois Kanimba (MINEACOM), Clare Kamanzi uyobora RDB, Francis Gatare nawe wahoze ayobora RDB, n’abandi banyacyubahiro banyuranye.

Kwinjirira muri iki gitaramo cyasusurukijwe n’umuhanzi The Ben n’itsinda ry’abanyamuziki bo ku Nyundo byari amadolari ya amerika 120 ku muntu umwe, naho abaguze ameza icyarimwe bakishyura amadokari 1 000, tubaze amatike ibihumbi bitanu yacurujwe ku madolari 120, RDB yaba yinjije ibihumbi 600 by’amadolari (ararenga 504 000 000 Frw) mu matike.

Aha hakiyongeraho amafaranga amadolari 13 700 (aya ararenga 11 508 000 Frw) yacurujwe muri cyamunara yabereye imbere mu gitaramo hacuruzwa amatike yo kurara mu mahoteli anyuranye, ndetse n’ibindi byacurujwe ku ruhande mukiswe “Silent Auction” byo tutamenye agaciro kabyo.

Kuwa gatanu w’icyumweru gitaha, tariki 01 Nzeri 2017 mu Kinigi i Musanze hazabera umuhango wo kwita amazina abana b’ingagi 19 bavutse muri uyu mwaka.