Amadini n’abakorera Siporo muri stade ya Muhanga bazajya bishyura

Inama njyanama y’Akarere ka Muhanga yafashe icyemezo cyo gushyiraho ibiciro ku bantu bakeneye gukorera siporo muri Stade ya Muhanga. Aya mabwiriza areba abakora ibikorwa bya siporo mu buryo bw’ubucuruzi n’amadini.

Abakoresha stade Muhanga bose bashyiriweho ibiciro bishya

Ubusanzwe Stade ya Muhanga yishyurwaga n’amakipe yayikiniragaho akomeye yishyuraga 10% y’amafaranga yinjiye. Kuri ubu njyanama y’Akarere ka Muhanga imaze gufata icyemezo cyo kwishyuza abayikoresha bose.

Amakipe mato niyo yari asanzwe ahakinira nta kiguzi, amwe muri ayo niyo yatunzwe agatoki kuba akwiye kujya yishyura kuko ngo nayo yinjiza amafaranga aturutse mu bishyura baje kwigishwa imikino.

Uretse aya makipe Njyanama yafashe kandi icyemezo cyo kwishyuza abanyamadini bifuza gukoreramo ibiterane by’inyigisho n’amasengesho ibiciro byabo bigakubwa kabiri bijyanye n’inshuro bifuza gukoresha stade.

Gashugi Innocent umukozi ushinzwe Urubyiruko, Siporo, n’Umuco mu karere ka Muhanga avuga ko kuva aho aya mabwiriza ya Njyanama agiriyeho hari amakipe 3 amaze kwishyura kandi ko igiciro njyanama yemeje kitari hejuru ugereranije n’amafaranga aya makipe yinjiza ku munsi.

Umunyamabanga Nshingwabikorwa w’agateganyo w’Akarere ka Muhanga Mbasha David yabwiye Umuseke ko iki cyemezo cya Njyanama bagiye kugishyira mu bikorwa kuko bizinjiriza akarere imisoro ndetse bigatuma na stade ihorana isuku.

Mbasha yagize ati: “Stade yatwaye amafaranga menshi, iki cyemezo kiziye igihe kuko abayikoreshaga wasangaga bakora siporo mu buryo bw’akajagari, kuri ubu twashyizeho inzego zishinzwe kugenzura ko bishyuye.”

Amakipe matoya azajya yishyura ibihumbi 50 by’amafaranga y’u Rwanda ku kwezi, mu gihe abanyamadini bazajya abatanga ibihumbi 150 ku munsi, cyakora baramuka bayikoresheje ijoro n’amanywa bakishyura ibihumbi 250.

Iki cyemezo ntikireba amarushanwa y’ibigo by’amashuri n’abantu bakora Siporo ku giti cyabo mu gihe cya Week-end, ariko hari icyibazwa niba insengero zikunze gukorera mu byumba by’iyi Stade zizakomeza kuvangwa n’ibikorwa bya Siporo.

Abayikoresha bose bagomba kubanza kwishyura kuri konti y’akarere

MUHIZI Elisee

UMUSEKE/Muhanga.

 

from UMUSEKE http://ift.tt/2wcWACz