Minisitiri w’ingabo z’u Burundi avuga ko agendeye ku mwuka mubi uri hagati y’u Rwanda n’u Burundi ndetse n’uburyo abaturage baturanye n’umupaka baba bafite impungenge z’uko bagirirwa nabi, yabahumurije abamara impungenge abamenyesha ko Abanyarwanda batinya abasirikare b’u Burundi.
Mu Nteko Nshingamategeko y’i Burundi ubwo hateraniraga inama yiga ku mutekano, Minisitiri w’Ingabo n’uw’umutekano babajijwe igiteganywa mu gihe bivugwa ko u Rwanda ruhungabanya umutekano w’u Burundi.
Nk’uko bitangazwa na Ijwi rya Amerika, Depite Hatungimana Venant yatangiye abaza ikibazo cy’u Rwanda n’u Burundi, yibaza niba cyaba gishingiye ku butaka cyangwa niba hari ikindi cyaba kibyihishe inyuma.
Ati “bimaze kugaragara ko hari ukutumvikana hagati y’igihugu cyacu n’u Rwanda, kubera gupfa urubibi mu gace ka Sabanerwa mu ntara ya Ngozi hamwe na Mabayi mu Kibira, abasirikare b’u Rwanda bakaba bamaze kwica ab’u Burundi babarashe n’imbunda,…. Ko abaraswa n’abasirikare b’u Rwanda bivugwa ko baba barenze imbibi byaba ari byo cyangwa ni umubano mubi?
Minisitiri w’Ingabo, Emmanuel Ntahomvukiye yasubije agira ati “Ikibazo kijyanye n’abaturage badafite umutima udatekanye kubera umutekano muke, baba bafite ubwoba ko Abanyarwanda bazagira icyo babatwara, njyewe ndibuka nkiyobora intara ya Kibitoke barakimbajije, kandi narababwiye nti ‘nibatekane bashyire umutima hamwe’ icyo nababwira ni uko Abanyarwanda batinya abasirikare b’Abarundi”.
Akomeza avuga ko n’amateka abigaragaza ko Abanyarwanda batigeze batsinda Abarundi, ati “n’amateka arabigaragaza, nta na rimwe Abanyarwanda bateye u Burundi ngo bagende amahoro, izina ryo mu Kirundo rirabigaragaza ni intambara yabaye hagati y’Abarundi n’Abanyarwanda.
Yasabye Abarundi gutuza bakigira ku Banyarwanda uko bagomba kwitwararika, ati “Abarundi batuze bubahirize amabwiriza Leta iba yabahaye, ibicishije ku bashinzwe umutekano, ko bagira discipline nk’iyo Abanyarwanda bafite”.
Min.Emmanuel Ntahomvukiye yasubije agaragaza uburyo abasirikare b’u Rwanda badatinywa n’ab’u Burundi, mu gihe Leta y’u Burundi ishinja u Rwanda guhungabanya umutekano wa bwo, ko abasirikare b’u Rwanda bavogera urubibi rw’ibihugu byombi bamwe bakabiburiramo ubuzima ku ruhande rw’u Burundi.
Ibi byagarutsweho mu gihe hari Abarundi bagiye barasirwa ku butaka bw’u Rwanda, muri Kanama 2016 Murenge wa Bugarama mu Karere ka Rusizi , abasirikare b’u Rwanda barashe abaturage babiri b’u Burundi.
Uwari umuvugizi w’Ingabo z’u Rwanda, Lt Col René Ngendahimana, yabwiye itangazamakuru ko babajije abo baturage abo ari bo bakanga gusubiza baraswa ubwo muri iryo joro, yashimangiye ko Abarundi bakora ibikorwa by’ubushotoranyi ku Rwanda, kandi ko uburyo bwo gukemura ikibazo, ari uko Abarundi bahagarika ubwo bushotoranyi.
Umubano w’u Rwanda n’u Burundi watangiye kuzamo agatotsi mu 2015, Leta y’u Burundi ishinja u Rwanda kuba inyuma y’ibikorwa byahungabanyaga umutekano mu Burundi, ibintu u Rwanda rwahakanye kenshi rwivuye inyuma.
Nyuma y’ibyo byose bwarushinjaga, bwahagaritse ubuhahirane.
Mu cyumweru gishize nibwo umuvugizi w’igisirikare cy’u Burundi, Col Baratuza Gaspard yatangaje ko u Rwanda rwanze kwitabira imikino ya gisirikare ihuza ibihugu byo mu muryango wa Afurika y’Iburasirazuba ikaba ibera i Burundi.
Ubwo iyi mikino yaburaga iminsi ibiri, yagize ati “ imyiteguro kuri iri rushanwa yaratangiye, ariko u Rwanda ntirwigeze rugaragaramo. Twakiriye abahagarariye ibihugu bya bo bitandukanye muri EAC, ariko nta munyarwanda wigeze agaragaramo”.
Mu gihe ku ruhande rw’u Rwanda bataratangaza icyaba cyaratumye batitabira ayo marushanwa arimo kuba ku nshuro ya 11, amarushanwa aheruka yo ku nshuro ya 10 yabereye mu Rwanda, bitangazwa ko nta muntu wo mu gihugu cy’u Burundi wigeze ubonekamo. Ibi bikagaragaza ko umubano w’ibi bihugu ukomeje kuzamo agatotsi.
Kanda hano ujye ubona amakuru yihuse kandi kugihe kuri Facebook no kuri twitter
Nsengiyumva Philippe/Bwiza.com
from bwiza http://ift.tt/2vkPziU
via IFTTT
No comments:
Post a Comment