Mukantabana Mathilde na Vlora Çitaku bahagarariye ibihugu byabo muri Leta zunze ubumwe za Amerika bombi babaye mu nkambi z’impunzi bakiri bato, kandi ibihugu byabo byabayemo jeniside. Baganiriye inzira y’umusaraba banyuzemo, kugeza babaye abo baribo ubu. Ni mu kiganiro Politico’s Women Rule podcast.
Vlora Çitaku ukomoka muri Kosovo yahungiye muri Masedoniya ku myaka 18, naho Mukantabana Mathilde yahungiye i Burundi akiri umunyeshuri.
Yibuka ibyabaye muri Jenoside yakorewe aba Alubaniya bakomoka muri Kosovo yakozwe n’Abaseribe, Citaku avuga ko byari biteye ubwoba “abantu ibihumbi amagana barishwe, abagore benshi bafatwa ku ngufu”.
Naho Mukantabana we, wari mu bwoko bw’ Abatutsi, yirukanwe mu ishuri mu 1973 ahungira i Burundi, yibuka ko “icyo gihe abantu bari barataye icyizere, nta wizeraga urwego urwo ari rwo rwose, haba urwa Leta, Kiliziya, yemwe nta n’uwari ukizera umuryango we”.
Mu 1994, ubwo Mukantabana yigishaga i California muri Amerika, umuryango we wamariwe mu Rwanda igihe cya jenoside yakorewe Abatutsi.
Ikindi Citaku we avuga, ni iteshwagaciro ry’abantu yirebeye mu bwana bwe. Agira ati, “kubona abapolisi bagukubitira umwarimu wawe mu maso, ntacyo wabikoraho birababaza. Mwarimu aba ari intwari ku munyeshuri we, niwe afatiraho urugero, kumubona akubitirwa ubusa rero bitera agahinda”.
Abanyalubaniya birukanwe mu mashuri, ariko baza kwishakamo imbaraga bashinga ayabo mashuri, abana bariga.
Agira ati “Diaspora yacu yari ikomeye, ishyiraho uburyo bwo gukusanya amafaranga nk’umusoro, amafaranga araboneka, maze ababyeyi banjye n’abandi barimu batangira kubona agashahara”.
Ariko ngo nyuma ingabo z’Abaseribe zaje kubatatanya bakwira imishwaro, Citaku atandukana n’ababyeyi muri ako kavuyo, ahungana na barumuna be batatu muri Maseduwani. “Twakoze urugendo rw’amaguru hafi umunsi wose, ndibuka ko nagezeyo naniwe cyane kuko nari nteruye karumuna kanjye gato, ikindi nari mfite ubwoba bwinshi”.
Umugore afite uruhare mu kubaka umuryango wasenywe n’intambara
Ubwo birukanwaga mu gihugu muri 1973, Mukantabana na bagenzi be bagiye mu nkambi z’impunzi i Burundi, basiga ababyeyi babo. Ababyeyi ntibamenye niba bariho cyangwa barapfuye.
Mukantabana avuga ko abavandimwe be batikiriye muri Jenoside we ari muri Amerika, akagaruka ku kuntu abicanyi batifuzaga ko hari umututsi usigara, habe n’iyonka.
Ngo nubwo ubuzima bw’inkambi butari bworoheye umwana w’umukobwa, ngo abagore barikomeje, batwaza gitore, ku buryo Mukantabana anavuga ko ‘hari bagenzi be bateye imbere kumurusha’.
Avuga ko abagore bahawe ijambo, ubu bakaba bagera kuri 64% mu nzego zifata ibyemezo mu Rwanda. Mu byo bagezeho harimo no kongera ikiruhuka cy’umugore wabyaye, amategeko arebana n’izungura ndetse n’uburenganzira ku butaka.
Ibi abihurizaho n’umunyakosovokazi, nawe uvuga ko iwabo intambara irangiye bashizeho 30% by’imyanya y’abagore mu nzego zifata ibyemezo, nubwo kubwe kujya mu myanya atari cyo kihutirwa. Ati, ‘Biraboneka ko abagore bari mu nzego z’ibihugu, ariko ibyo ntibivuga ko bafite ijambo, cyangwa bafite ubwisanzure n’ubwigenge’.
Mu gusoza uyu munyakosovokazi agaragaza akababaro k’uko abatuye isi badahinduka, ngo imvugo « Ntibizongera » ibe ingiro. Ahereye ku mpunzi z’abanyasiriya agira ati, « Twirwa tuvuga ngo ntibizongera, ibyabaye birahagije, ariko ahubwo bikaza birusha ubukana ibya mbere ».
Arangiza asaba abanyapolitiki gushaka umuti w’ubuhunzi, ariko n’abaturage bakakira neza impunzi kuko nta n’imwe yabyigize. Citaku ati, “nta wifuza kuba impunzi, nta n’ubihitamo”.
Kanda hano ujye ubona amakuru yihuse kandi kugihe kuri Facebook no kuri twitter
Jean Baptiste Karegeya/Bwiza.com
from bwiza http://ift.tt/2wd784x
via IFTTT
No comments:
Post a Comment