Wa mukozi washatse kuroha abana yareraga muri Nyabarongo yakatiwe gufungwa Burundu

 

Kuri uyu wa gatatu, Urukiko rwisumbuye rwa Muhanga rwakatiye igifungo cya burundu uwari umukozi wo murugo witwa Munezero Ernestine w’imyaka 23 wateshejwe arimo kuroha muri Nyabarongo abana babiri b’aho yakora.

Mu mpera z’ukwezi kwa Kamena gushize, Munezero Ernestine yafashe abana babiri bo mu rugo rwa Ngendahimana Peter utuye mu Mudugudu wa Kabasanza, Akagari ka Gihara, Umurenge wa Runda, mu Karere ka Kamonyi yakoragamo ajya kubaroha mu ruzi rwa Nyabarongo.

Agezeyo mu gihe yarimo abaroha, yashyizemo umwana wa mbere, mu gihe yarimo aroha uwa kabiri arasakuza cyane amusaba imbabazi mu magambo ateye impuhwe ati “Mbabarira Tante, Mbabarira Tante”, nk’uko abatangabuhamya barimo bahinga hafi y’aho yari agiye kubaroha babivuze.

Abo bahinzi ngo bamaze kubyumva baje batabaye, batesha Munezero abana batarapfa dore ko ngo yarimo agerageza kubasomeza, abatsindagira mu mazi.

Munezero amaze gufatwa yemeye icyaha, avuga ko yari kumara kubaroha nawe akiyahura. Ibi byose ngo yabikoze ari ukwihorera kuri Se wabo, ngo wamusambanyije inshuro ebyiri.

 

 

Urubanza rwa Munezero rwabunishirijwe mu ruhame aho yakoreye icyaha mu Murenge wa Runda kuwa kabiri w’icyumweru gishize tariki 18 Nyakanga.

Kuri uyu wa gatatu tariki 28 Nyakanga, Perezida w’urukiko rwisumbuye rwa Muhanga Mudahemuka Adolph waburanishije uru rubanza yahanishije Munezero Ernestine waburanye yemera icyaha gufungwa burundu, amuhamije ibyaha by’ubugome, kugambirira kwica, n’ubwinjiracyaha mu bwicanyi.

Nyuma y’uko urukiko rusomye uyu mwanzuro, Se wa bariya bana bari bagiye kurohwa, Ngendahimana Peter yavuze ko yishimiye igihano cyahawe Munezero wahoze amukorera kuko aricyo cya nyuma, gusa ngo iyo haba ikindi kirenzeho nicyo yari kumwifuriza.

Abaturanyi b’uyu muryango bavuga ko ibyo uriya mukozi yakoze ari ubunyamanswa, bo bavugaga bati “Iyaba igihano cy’urupfu cyagarukaga uyu nicyo akwiye.”

Munezero nyuma yo gukatirwa yari acyemera icyaha, ndetse yavuze ko yakiriye igihano yahawe, gusa ngo aricuza kuba atarabashije kurega Shebuja

Muhizi Elisee
UMUSEKE.RW/Kamonyi

from UMUSEKE http://ift.tt/2tJFYS0