Rwamagana:Abakorera mu gakiriro bafunze imiryango kubera amashanyarazi yarabuze

Abakorera mu gakiriro ka Rwamagana gaherereye mu murenge wa Kigabiro, bahagaritse akazi bitewe no kubura amashanyarazi, bamwe bafunze imiryango bakaba banasaba ubuyobozi gukemura ikibazo cy’umuriro bakongera gukora.

Ku wa Gatanu abakozi ba REG (Rwanda Energy Group) bagiye kureba ikibazo gihari ntibagira icyo bagikoraho, abahakoreraga bakaba bibaza amaherezo yabyo dore ko akazi kabo karimo gupfa. Abakorera muri ako gakiriro baravuga ko ubu birirwa bicaye batakibasha gukora akazi kabo.

Izerimana Regis asanzwe akorera mu gace kahawe abasudira,  avuga ko bamwe mu bakoreraga mu gakiriro bakavuyemo bongera kujya hanze yako naho abandi bo inzara ibamereye nabi.

Agize ati “aka gakiriro niko kadutunze ariko ubu tumaze hafi icyumweru tudakora kubera ko nta mashanyarazi  ubu dufite kandi nta kizere dufite ko ikibazo cyakemuka  vuba, turibaza uko tuzabaho kuko ubu akazi dukora ko gusudira bisaba kuba ufite umuriro none abakorera hanze y’agakiriro nibo bakora, badufashije bagakora umuriro byadufasha kuko ubu biratugora kubona uko dutunga imiryango yacu bidakozwe vuba twakicwa n’inzara.

Ubuyobozi bw’agakiriro ka Rwamagana buremeza ko muri aka gakiriro bahuye n’ikibazo cy’amashanyarazi bitewe n’igaburiro ry’amashanyarazi (Transformateur).

Mu kiganiro Bwiza.co yagiranye na Ntirenganya Jean Baptiste, umuyobozi w’abakorera muri ako gakiriro agira ati «ikibazo cyatewe na transfo yangiritse ariko twabimenyesheje ababishinzwe barimo na PSF dutegereje ko baza kubikora kuko biratubangamiye ariko turizera ko ababishinzwe  bakemura icyo kibazo kugirango tubashe gukomeza gukora » .

Umuyobozi w’urugaga rw’abikorera mu Karere ka Rwamagana, Murenzi Jean Baptiste avuga ko ikibazo cy’umuriro kiri mu gakiriro bakimenye kandi kizakemuka vuba.

Ati « Muri iyi minsi abantu barahuze ariko turabakorera ubuvugizi ku buryo nyuma y’itariki ya 23 tuzashaka uburyo icyo kibazo  cyakemuka vuba kuko icyo kibazo barakitumesheje ».

Akazi bamwe babaye bakimuriye ahandi kubera amashanyarazi

Ubuyobozi bw’akarere ka Rwamagana buvuga ko butamenye ikibazo cy’amashanyarazi mu gakiriro, bagiye kugikurikirana

Nkuko byemezwa na n’umuyobozi wungirije ushinzwe ubukungu n’iterambere mu karere, Mudaheranwa Regis.

Ati « ntabwo twari tukizi ariko tugiye kubikurikirana, ni wowe ukimbwiye ubwo ndakurikirana menye niba ari byo koko uko ubitubwiye ».

Abakorera mu gakiriro barenga 100 bamaze umwaka n’igice bahakorera, aka gakiriro kari mu maboko y’akarere ka Rwamagana ariko abahakorera biteganyijwe ko bazegurirwa ako gakiriro.

Bimwe mu bikorwa byakorerwaga muri aka Gakiriro byarahagaze

Kanda hano ujye ubona amakuru yihuse kandi kugihe kuri Facebook no kuri twitter

Ngabonziza justin/Bwiza.com

from bwiza http://ift.tt/2uJJKKB
via IFTTT