Meya wa Rubavu Sinamenye Jeremie yaba yatawe muri yombi

Umuyobozi w’Akarere ka Rubavu, Sinamenye Jeremie biravugwa ko ari mu maboko ya Polisi akekwaho kugira imyitwarire idakwiriye umuyobozi.

Amakuru agera kuri Bwiza.com aravuga ko uyu muyobozi  yaba yarafatiwe muri hoteli igira n’amacumbi ku wa Kane tariki ya 20 Nyakanga 2017, ari kumwe n’umugore ukora mu karere ushinzwe abakozi witwa Dukundimana Esperence wigeze kuba Umunyamabanga Nshingwabikorwa w’Umurenge wa Nyamyumba.

Ayandi makuru aravuga ko n’Umunyamabanga Nshingwabikorwa w’Umurenge wa Nyamyumba, Ugirirabino Elzaphan na we yatawe muri yombi.

Abantu batandukanye baravuga ko uyu muyobozi atigeze agaragara ahari ibikorwa bitandukanye byo kwamamaza umukandida w’Umuryango FPR Inkotanyi muri ako karere,  by’umwihariko ibyabereye uyu munsi mu murenge wa Rubavu.

Hari n’abavuga ko ashobora kuba akurikiranyweho kutakira umwe mu bakandida bahatanira umwanya wa Perezida wa Repubulika mu Rwanda, ariko abari hafi y’uwo mukandida babihakanye, bavuga ko batagiye kumushaka, bagiye ku karere bajyanyeyo ibaruwa kandi yakiriwe neza.

Ku rundi ruhande hari abavuga ko mu mikorere ye yaba afata ibyemezo atagishije inama bagenzi be bakorana hafi.

Abageze ku biro by’akarere bavuga ko batigeze bamuca iryera, ahubwo hari urunturuntu hagati y’abakozi baganira ku bya Meya n’uwo muyobozi.

Twagerageje kuvugana n’umuvugizi wa Polisi mu Ntara y’u Burengerazuba, telefoni iva ku murongo nyuma yo kumubwira iki kibazo.

Inkuru turacyayikurikirana……

Kanda hano ujye ubona amakuru yihuse kandi kugihe kuri Facebook no kuri twitter

Nsengiyumva Philippe

from bwiza http://ift.tt/2vImsSw
via IFTTT