Mako Nikoshwa ntabanye neza n'abahanzi nyarwanda bagenzi be

Mako Nikoshwa wamenyekanye cyane mu ndirimbo nka Bonane, Agaseko yanasubiwemo n'Abasore nka Green-P ndetse na Pacson, n'izindi nyinshi avuga ko abahanzi nyarwanda ngo batajya bahuza kuko ngo babona abarenze kandi bose babona arinkabana kuriwe.

Mu kiganiro yagiranye n'Imirasire yavuze ko byagaragaye mu gihe yigeze kurwarira mu bitaro CHUK maze agasurwa n'abahanzi bake cyane, aho avuga ko ashimira cyane Miss Channel wasurishije ubufasha bw'Amafaranga ndetse akanamuba hafi cyane nubwo yabaga ari mu Bufaransa.

Yakomeje ashimira cyane abana b'abanyeshuri muri zakaminuza zitandukanye zo mu Rwanda bagiye bamusura muri ibi bihe bye byari bikomeye, si aba banyeshuri gusa ahubwo ngo yanasuwe n'abana bato cyane bari munsi y'imyaka 5 ngo bamuha amafaranga 30,000frw.

Ibi kandi ni nabyo byatumye ahimba indirimbo yitwa “oooh lala”(Abo Duhuza) kuri ubu amashusho yayo akaba agiye no kujya hanze, aho avuga ko ahuza cyane n'abafana be kurusha abo basangiye umwuga, muri iyi ndirimbo avuga ko kuva 2004 yatangira umuziki atigeze akorana n'abahanzi bagenzi be cyane kumpamvu nawe atazi yatumaga abahanzi nyarwanda batamwishimira kandi mu byukuri abanyarwanda muri rusange bo bamukunda.

Mako Nikoshwa yagize icyo avuga kuri PGGSS

Twaganiriye kubijyanye na PGGSS avuga ko kuva yatangira yari afite ibikorwa byiza kandi byinshi ariko ngo bakarenga bagashyiramo abana batanazwi we bakamwirengagiza ngo nyamara nta n'umwe wamurushaga ibikorwa bizima.

Yagize ati:” mu bahanzi batandukanye bagiye baca muri PGGSS nta n'umwe ufite indirimbo yakunzwe nka; Bonane, Agaseko,Mujyane, Nkunda kuragira, Untekerezaho, Nirere, n'izindi nyinshi ariko bakarenga bagashyiramo abana batanazwi, dore ko abenshi ahubwo banamenyekaniye muri PGGSS.”

Uyu muhanzi kandi yivugiye ko PGGSS yamutumira itamutumira kuri ubu ntacyo bimutwaye ngo kuko nta n'umwe uzigera umurusha umuziki mu Rwanda ,dore ko avuga ko mu Rwanda ariwe muhanzi wa mbere kandi w'igihangange kurusha abandi.

Icyakoze Mako Nikoshwa yasoje avuga ko PGGSS imushyizemo yabyemera ariko kujyamo kwe bikaba ngo ari ugutanga urugero rwiza no kwerekana ikosora kubana bashyirwa muri PGGSS, ngo kuko nta kabuza yahita ayitwara kubw'ibikorwa bye byivugira.

Emmanuel Habiyakare

from Imirasire.com | WebRwanda.com http://ift.tt/2vrJ7mI
via IFTTT