Korali ‘Friends of Jesus’ barifuza kwibutsa abantu ibihe bigoye Imana yabanyujijemo

Abagize Korali Friends of Jesus baravuga ko mu gitaramo bazakora ku wa 19 Kanama bazibutsa abazakitabira amasezerano bagiye bagirana n’Imana n’ibihe bikomeye yagiye ibanyuzamo.

Ngo muri iki gitaramo bazibutsa abantu ko hari ibihe bigoye Imana yabatambukijemo

Muri iki gitaramo cyo kwizihiza isabukuru y’imyaka 20 iyi korali imaze ikora, ngo barifuza gusangiza ubuhamya bw’ibyo banyuzemo kugira ngo n’abazakitabira bazasubize amaso inyuma bibuke ibihe bikomeye Imana yabanyujijemo.

Mu kiganiro kihariye yagiranye n’Umuseke, umuyobozi w’iyi Korali, Gahunde James yavuze ko buri wese utuye ku Isi hari ishimwe afitiye Imana ku buryo iki gitaramo kizaba umwanya mwiza wo kuzirikana igihango buri muntu yagiranye n’Imana.

Ati “Tuzaba dufite ubuhamya butandukanye kandi bukomezanya. Turifuza ko impano Imana yaduhaye tugomba kuzamura icyubahiro cy’Imana mu majwi meza cyane.

Turifuza ko umuntu azajya yibuka ko ari igitaramo cyamwibukije amasezerano y’Imana n’ibitangaza Imana igenda imukorera mu buzima bwe bwa buri munsi.”

Avuga ko abazitabira iki gitaramo bazafatanya mu kuzamura ishimwe ry’Imana kandi bakarushaho guhorana ikizere ko Imana ishobora byose.

Abagize iyi korali bavuga ko bahorana inyota yo gufasha abatishoboye kugira ngo ibyo bagezeho babisangize abandi.

Muri iki gitaramo kizabera muri Convention Center, Friends of Jesus izafatanya n’andi makorali akomeye mu Rwanda nka Ambassadors of Christ na Elevate z’i Kigali, Urugero y’i Gisenyi, korali yo muri Kenya yitwa For Him na The Voice izaturuka muri Tanzaniya.

Kwinjira bizaba ari 10.000 Frw ku bantu bakuru, abana bari hagati y’ imyaka 5 n’imyaka 10 bazishyurirwa n’ababyeyi 5000 Frw, naho abana bari munsi y’imyaka 5 bazinjirira ubuntu.

Amatike yo kwinjira muri iki gitaramo yamaze gusohoka. Araboneka kuri Nu-vision opticals iherereye mu nyubako ya UTC mu Mujyi wa Kigali, kuri banki ya Goshen ishami rya Remera ku Kisimenti no kuri Dynapharm ahahoze Lacomette .

Ku itariki ya 02 Nyakanga bafashije abatishoboye bo mu murenge wa Gahanga (Muri Kicukiro), bubakira umwe muri bo, bafasha abafite uburwayi bw’amatwi kubuvurwa, bishyura ubwisungane mu kwivuza bw’abantu 150, banatanga ihene 29.

Iyi korali yagiye inyuramo abantu batandukanye, imaze gucamo abantu bagera kuri 105, ubu ikaba igizwe n’abari hagati ya 25 na 35. Friends of Jesus bamaze gushyira hanze album zirindwi ziriho indirimbo 70.

Friends of Jesus ibarizwa mu itorero ry’Abadivantisti b’umunsi wa Karindwi riherereye i Kibagabaga mu Mujyi wa Kigali, ku rusengero rw’abakoresha ururimi rw’icyongereza (English church).

Basanzwe bakora ibitaramo bishimisha benshi

Bakora mu muhogo bikanyura abumva indirimbo zabo

Mu minsi ishize bubakiye utishoboye utuye mu murenge wa Gahanga

Banatanze ihene 29

 

Daddy SADIKI RUBANGURA
UMUSEKE.RW

from UMUSEKE http://ift.tt/2uWXJNq