Mapiki yabaye akimbwira gutyo koko ndahindukira, ngikubita amaso umukobwa wari uryamye hirya yanjye nkubitwa ni inkuba itagira amazi Nelson na Brendah birabayobera.
Nikoreye amaboko negera imbere natera intabwe igatitira ngera ku kindi gitanda ahari hari umuganga wacungaga impumeko ye isegonda kurindi ako kanya,
Nelson-“Daddy! Ubaye iki gitumye wikanga bene aka kageni? Uwo muntu wegera se uramuzi? Ngwino dusure uyu musore wawe niwe murwayi tuje kureba”
Nakokeje kwitegereza imyenda y’umuhondo nakundaga kubona mu maso yanjye yari imanitse aho maze ntangira kumva umutima utera cyane muganga akuyeho akagofero yari yambaye,
Njyewe-“Ntibishoboka! Uyu se niwe?”
Muganga-“Ko muri gutera icyugazi munasakuza hano muzi ko ari mu cyumba cy’indembe? Ahubwo mube musohotse, mujye hanze mwese!”
Njyewe-“Muga! Wakwihanganye ko uno mukobwa muzi?”
Muhanga-“Ngo uramuzi? Ibyo se nibyo cyangwa ni bya bindi byanyu! Umukobwa twabuze umuntu waba umuzi n’umwe, uyu yatoraguwe mu rwobo rwa metero icumi, umuzi hehe?”
Njyewe-“Niwe! Nubwo isura ye yahindanye akaba acometse ibyuma byinshi ariko niwe mubwiwe niyi misatsi ye”
Muganga-“Uuuh! Ariko wa mugani wenda byaba ari byo da! Ubu uyu mukobwa ari mu maboko yacu, turi gukora ibishoboka byose ngo azanzamuke, kuva ejo abaganga bose niwe bariho gusa gukira kwe ni hamana!”
Njyewe-“Ni ukuri kose uyu ni Sacha umukobwa wa Afande!”
Bose-“Yeee?”
Nelson-“Uravugisha ukuri Daddy?”
Nkivuga gutyo bose byarabatunguye baranyegera ngo barebe ko wenda ntahahamutse kubera indembe nari maze kubona gusa yari we, nari namubonye, yari Sacha wabuze byose bikadogera,
Mapiki-“Ndakanywa ibuye mu gitaramo cy’aba Djama! Uziko nkize! Uwo ni wa mukobwa wa Afande uriya mushenzi ngo ni Bob yazirikishije online game?”
Njyewe-“Niwe, niwe rwose, Muga! Uyu mukobwa hashize igihe kinini abuze, yari yarashimuswe n’umusore ubu ufunzwe, umuryango we wamushakiye ahantu hose kugeza na nubu bari bataramubona”
Muganga-“Yooooh! Dore ahubwo ngo turagira amahirwe, nonese umuryango we waba uwuzi?”
Njyewe-“Cyane rwose, ahubwo reka nze mbahamagare mbahe aya makuru”
Ako kanya nafashe telephone vuba vuba ndeba nimero za Papa Sacha, ngikanda yes numva barambwiye ngo Sorry, Nelson wagirango yari yabimenye yahise ampa iye nandikamo nimero nshyira ku gutwi hashize akanya,
Papa Sacha-“Hello!”
Njyewe-“Hello! Papa Sacha ni Daddy!”
Papa Sacha-“Ngo Daddy? Bite sha!”
Njyewe-“Ubu ndi kwa muganga hano kacyiru, mubanguke tubonye Sacha niho arwariye kandi amerewe nabi cyane!”
Papa Sacha-“Hhhhh! Ariko sha ubwo uragirango ugere kuki?”
Njyewe-“Ntabwo mbeshya Papa Sacha! Murumva nakwifata nkabeshya abantu nkamwe twese twubaha?”
Papa Sacha-“Ariko sha uzi aho nageze hose nshaka umwana wanjye? Uzi amakuru namenyeyeyo? Warangiza ukaza unshinyagurira ngo umubonye hehe? Ubwo nawe mukanya uranyaka amafaranga”
Call end.
Njyewe-“Ibi ni ibiki ra! Papa we sibwo yanze kubyemera!”
Mapiki-“Uriya musaza erega ntako atagize ngo amuhigire hasi hejuru, wasanga yararangije kwiheba”
Nkiri kwibaza uko mbigenza nahise mbona numero ya Joy impamagaye nyisamira hejuru,
Njyewe-“Hello Ma Beauty Joy! Wabimenye ko nagushakaga,…”
Joy-“Wanshakiraga iki Cheri!”
Njyewe-“Sacha! Ubu ndi imbere ya Sacha!”
Joy-“Mana wee! Ni muzima?”
Njyewe-“Ni muzima ariko ararembye cyane, nabibwiye Papa we ariko yanze kubyumva ngo ndi kumutekera imitwe!”
Joy-“Yebaba wee! Muri hehe se?”
Njyewe-“Turi hano ku bitaro bya kacyiru!”
Joy-“Mana wee! Mfasha izi nzozi narose zitaba impamo, Ndaje Cheri! Hagume ndaje ni ukuri”
Call end.
Muganga-“Ngaho rero dore abaganga baraje mube mmusohotse bakomeze bamwiteho!”
Twese twarasohotse tujya hanze tukigera aho abategerereza baba bicaye Nelson aranyitegereza ako kanya,
Nelson-“Daddy! Koko uriya mukobwa ubonye ni Sacha wa Afande umwe wafunzwe uzira?”
Njyewe-“Niwe erega! Njyewe ndamwiboneye kandi namugenze iruhande kenshi, nta kabuza niwe rwose!”
Nelson-“Nonese kuki Papa we yanze kumva ngo aze atabare?”
Njyewe-“Nanjye ubu biranshanze rwose mbuze icyo nkora, ni ugutegereza Joy akaza akaba ariwe ubemeza ukuri”
Nelson-“Ariko kuki ukuri kwakirwa gutinze ikinyoma kikakirwa mbere? Reba ukuntu isi yayimarishije amaguru ajya iyo ngo ari gushaka umwana we none dore aho abonekeye ati urabeshya”
Brendah-“Ahaa! Ntawe bitatera kwibaza, gusa Imana ifashe uriya mwana w’umukobwa uri hagati y’umupfu n’umupfumu, uwakwibuka bwa bwiza yari afite ntiyamubona aryamye hariya”
Ako kanya sinzi icyanjemo mba ndahagurutse, ngitera intambwe ngo nsohoke numva Nelson arampamagaye ndahindukira mbon afite ya bahasha nari nahawe, ahita aza ansanga tugenda tuganira,
Nelson-“Nonese ko wari uyitaye? Usa nuwacanganyikiwe ariko!”
Njyewe-“Ugira uti se byo sinacanganyikiwe, sinibukaga ko nanayifite!”
Nelson-“Ngaho akira rero yibike, wasanga irimo ibanga wari wahishiye Joy!”
Njyewe-“Ntureba se ko yanditseho izina ryanjye! Ni iyanjye da!”
Nelson-“Uuuh! Ukaba utarayifungura? Waba utagira amatsiko!”
Njyewe-“Babaye bakiyimpa uhita umpamagara nza nihuta, sinibukaga ko nanayifite, ahubwo reka nze mfungure”
Ako kanya twahagaze aho twari tugeze maze mfungura ibahasha nkuramo urupapuro nkiruzingura mbona havuyemo agapapuro kubera umuyaga wari uri aho twari karaguruka,
Nelson-“Daddy! Fata iyo cheque itagucika…”
Natangiye kuyiruka inyuma jugujugu mba ndayisingiye, nkirebaho koko mbona ni cheque yari yanditseho amazina yanjye.
Narikanze nibaza icyo ihatse ndagaruka aho nari nsize Nelson mugezeho ahita ambaza vuba,
Nelson-“Ni iyawe se Daddy?”
Njyewe-“Ni iyanjye rwose, ahubwo se ninde uyohereje?”
Nelson-“Soma rwa rupapuro ibyaribyo byose birimo!”
Nafunguye rwa rupapuro ndarucurikura ntangira gusoma ibaruwa yari yandikishije ikaramu, yagira ati,
“Nshimishijwe no kuba usomye iyi baruwa, ikubiyemo byinshi utamenye njye namenye nkagira ibyishimo bikomeye nyuma yo kwiyegereza Mama wawe ukubyara ngaterwa ishema ryo kubwirwa ko ndi So”
Nelson-“Ngo? Ngo So?”
Njyewe-“Nelson! Njyewe ndambiwe abantu bagishaka kunshinyagurira, ubu se nkuyu koko…”
Nelson-“Oya Daddy! Komeza usome wasanga ari ihirwe rije rigusanga, kandi umunsi umwe nigeze kukubwira ko hari umunsi uzongera kwishima, bijya kuba njye nabibonye erega”
Njyewe-“Ngaho akira iyi baruwa usome, ntabwo nakomeza kuyisoma irimo amagambo ankomeretsa umutima”
Nelson yafashe ibaruwa maze agorora umuhogo akomeza kunsomera nanjye nteze amatwi numva akantu ku kandi,
“Daddy! Ntabwo nari nzi byose, nari nziko uri umwana wa Gatera nkuko Mama wawe turi kumwe yabimbwiye umunsi nazaga ngasanga agufite, kubera ubwoba yari yarabibwemo na Gatera yakomeje kubimpisha, ariko umunsi nuyu w’ibyishimo ngo umenye ko njye So ndiho kandi nishimiye bikomeye kumenya ko uri uwanjye”
Njyewe-“What? Ariko ibyo ni ibiki numva! Nelson zana urwo rupapuro ndebe ko ibyo uri gusoma aribyo!”
Nelson-“Oya Daddy! Tuza ibi nsoma nahoraga mbitegereje! Ahubwo urahiriwe musore wasesewe n’agahinda akaba ari cyo kiri gutuma ibi biba”
Nelson yakomeje gusoma ariko mu by’ukuri numvaga ndi ahandi hantu, natangiye kujya kure uko asoma nk’ikanga.
“Ntabwo nari nziko nasize akabuto keza umusore usoretse nkawe, byose nabimenye kubera online game, Bob wari umukozi w’umwizerwa wa Gatera niwe wambwiye ko Gatera atabyara, Gatera wangambaniye yari aziko ankuyeho ariko narashibutse, umunsi ampa abishi ngo bankure ku isi babikoze nabi, maze ndatabarwa, cyakora umugore wanjye we ntabwo byabaye byiza, ntiyashoboye kuharenga”
Njyewe-“No! Ngo ngo…”
Nelson-“Nta gushidikanya uyu ni Papa wawe Daddy! Ntabwo yapfuye! Woooow!”
Njyewe-“Ntabwo mbyumva neza Nelson! Subiramo!”
Nelson yaro ngeye asubiramo, binyanga mu nda mwaka urupapuro nanjye ndabyisomera, ntiwakumva ukuntu umutima wateye wihuta, ubwenge bwanjye bwikaraze busanga ibyishimo byinshi byari muri njye maze ndasimbuka nsakuza cyane,
Njyewe-“Ntibishoboka! Uyu ni Papa?”
Nelson-“Niwe rwose! Niwe wamenye ukuri kose, Daddy! Urahiriwe, uri umunyamahirwe, kandi nabibonye kuva cyera”
Gutuza byaranze nkomeza gusubiramo ayo magambo, hashize akanya intoki zititira nkomeza gusoma,
“Ndi Jules! So wakubyaye ntabimenye umwanzi akantera kugeza aho yinjiye mu byanjye byose, ndiho ndi kumwe na Mama wawe, iri ni rya banga rizitse nababwiraga rizahishuka ibyishimo bigataha imitima yanyu”
Nelson-“Nti wumva! Mbivuga!”
Nakomeje gusoma n’ibyishimo bivanze n’agahinda k’amateka, muri ako kanya nari nabaye undi,
“Ndakwifuza iruhande rwanjye! Wowe na Mama wawe nakunze cyera nkamuha isezerano ryangijwe n’ingirwa mugabo, aho ari ntateze kuhava, ibye byose biri mu maboko yanjye, nabyisubije ntamwibye nkuko yabigenje, nawe ndagushaka aha kuko ntateze kugaruka aho”
Nelson-“Ngo aragushaka? Daddy akaba akandagiye rutema ikirere yerekeje hakurya y’amazi! Hhhhhhh!”
Njyewe-“Ubu se… nako reka nkomeze nsome”
“Aho harimo Cheque yimwe muri bank inshungira imitungo mfite aho, ufate ayo mafaranga ushake ibyangombwa byose, mu minsi micye hari uzakuzana ino, ndi So ndagushaka uze unsajishe neza mwana wanjye! Iyi baruwa nikugeraho uzabimenyeshe, ndacyakurihafi, icyo ntakoze ndifuza kugikora ubu”
Namaze gusoma iyo baruwa maze Nelson ansanganiza ikiganza, ankora mu ntoki maze arambwira,
Nelson-“Daddy! Sinzi icyo nakubwira, ubuzima ni inzira igeza kuwihanganye aheza, ngaho iyuburure agahinda, ntabwo ukiri igiti kimwe nkuko wajyaga ubivuga, ahubwo ubu nibwo ugiye kubona ko ushagawe, felicitation!”
Njyewe-“Merci Nelson! Kandi warabiharaniye, sinzibagirwa buri kimwe cyose, nzahorana ihumure kuko wampumurijr kugeza kuri uyu munsi menye byose!”
Nelson-“Urakoze cyane! Nonese uri tayali kugenda?”
Njyewe-“Nelson! Ntabwo nasiga Joy! Eeh! Ahubwo dore nguriya ari kuza anadusanga, Ma Beauty ntabwo azpfa vuba!”
Ako kanya Joy yari atugezeho maze aza yihuta angwamo asuhuza na Nelson maze agaruka iruhande rwanjye,
Joy-“Cheri! Ko mwataye undi mwana wenyine mukaza aha?”
Njyewe-“Jo! Hari ubutumwa bungezeho nashakaga kubanza kureba, kandi ni inkuru nziza kuri njyewe nawe, gusa…”
Joy-“Oooh! Niba ari inkuru nziza nanjye ndishimye ntarayumva, gusa muze tujye kureba Sacha mbone kugira icyo nkora, Mana wee! Inzozi narose mbabarira ntizibe impamo”
Nelson-“Ahaaa! Ibyo uriya mwana w’umukobwa ni ah’Imana na Muganga!”
Twarakase dusubira hahandi, nubwo twari mu gahinda kabo ubuzima buri mu kaga, ariko numvaga noneho ngaragiwe, nari mfite ingufu zidasanzwe numva ndundi, tugeze aho Brendah yari ari ako kanya abaganga bahita basohoka njye na Joy dutera intambwe twinjira aho Sacha yari ari, Joy akimukubita amaso Sacha induru ayiha umunwa!
Yararize ararira arongera ararira, umutima we nari nzi ntabwo yari kwifata abona ibyago nkibyo, mbonye bimunaniye mujyana hanze ngo atuze, nk’ibisanzwe ikiganza cyanjye cyamukomezaga nticyamugiye kure, hashize akanya aratuza afata telephone areba nimero za Papa Sacha, amubwirana agahinda ibyo yari amaze kwibonera muri ako kanya.
Ntibyateye cyera twabonye imodoka iza yihuta cyane abantu baragwirirana ako kanya tbona havuyemo Papa Sacha ari kumwe na Mama Sacha ndetse na Mutoni, baza bagana aho twari turi, batugezeho,
Papa Sacha-“Niko ibyo muvuga ni ukuri?”
Mama Sacha-“Ariko se urumva bakubeshya bagamije iki? Umwana wanjye wee! Mana mfasha koko…”
Abaganga babonye agahinda ka Mama Sacha maze baduha inzira dukomeza mo imbere aho twari twasize Nelson na Brendah hashije akanya dutegereje umuganga araturembuza turinjira tukigeramo ibintu byabaye ibindi abarwayi bariyongera kubera kunanirwa kwakira ibyo umutima usimbiza ukaremererwa,
Papa Sacha-“Ntibishoboka! Uyu ni umwana wanjye koko nibyariye ngaha byose agatemba itoto mbona?”
Joy-“Yego niwe! Murebe neza niwe!”
Mama Sacha we yarahahamutse biba ngombwa ko abaganga bamwitaho, byari ibihe bikomeye kandi koko ubuzima buseseka ntibuyorwe iyo buri hagati na hagati bitera benshi gucika integer.
Ako kanya twagiye kubona tubona Sacha ahumeka cyane, muganga wari uhari areba ku byuma maze amukuraho icyuma cyamwongereraga umwuka,
Papa Sacha-“Mwana wanjye w’ikinege, ni wowe nabyaye nkitwa umugabo, natanze ibyanjye byose ngo uzabe umwana wizihiye bose, niwowe mugisha nagabiwe nkaba uyu ndiwe ari nayo mpamvu natanze ibyanjye byose ngo ngushaka none dore nkubonye usa naho unsezera”
Mama Sacha-“Oya weeee! Oya umwana wanjye ntapfe Mana yanjye weee! Mama wambyaye ntabwo nshaka kubura ikinege…”
Byari agahinda gakomeye kubona umubyeyi ungana Mama arira nk’umwana muto, byari bikomeye cyane kubona umugabo uhagaze bwuma azenga amarira mu maso, ako kanya Sacha yavuze n’akajwi gato, umwuka wanga ngo,
Sacha-“Papa! Mbabarira…”
Papa Sacha-“Mwana wanjye nakubabariye mbere, imbabazi z’umubyeyi zihora hafi urabizi, ngaho mbabarira ntudusige gutya!”
Sacha yakomeje kuzamura umwuka byanga ariko arongera avuga n’akajwi gato cyane ngo,
Sacha-“Mama nawe mbabarira”
Akivuga gutyo byaranze muganga amukozeho tubona arikanze asohoka yiruka ari nako ahamagara, muri ako kanya haza abaganga benshi badusaba gusohoka twese gusohoka ariko Papa Sacha na Mama Sacha bagumamo.
Twakomeje gutegerereza hanze ari nako twitangira itama ry’iburyo tugahindura iry’ibumoso, buri wese yibazaga igikurikiyeho, ari nano nsubira muri bya bihe byajye na Sacha, agahinda gakomeza kwiyongera hashize akanya twumva……………
NTUZACIKWE NA EPISODE YA 177 EJO MU GITONDO
from UMUSEKE http://ift.tt/2vdyV3x
No comments:
Post a Comment